Tun hnaia Dapchhuah lui humhalh lai dynamite bomb hmanga beitu mi pali, Aizawl Tlangnuam venga khawsate chu man an ni tawh a, The Mizoram Fisheries (Amendment) Act hnuaiah hrem an ni dawn.
Sorkar thuchhuahin a tar lan danin Dapchhuah Branch YMA-in hun rei tak luidung an humhalh tawh chu May 13 zing khawvar hma deuh khan bomb hmanga vawm a ni a, sangha man tumtute hi an lirthei hmangin an tlanchhia a, Rawpuichhip Forest Check Gate-ah tihdin ni mah se an tlanchhe chhunzawm a, tihdin an nih zawk laiin an hmanraw hman bang bomb leh lensuah chu kawngchhak lamah vawm chhuakin an tlan liam hnu hian an hmanruate hi chhar a ni.
Dapchhuah lui bomb hmanga beih a nih chungchangah hian Phaileng Police Station-ah FIR thehluh a ni a, police-te chuan pawikhawihtute chu nimin khan an man ta a, chung mite chu – Aizawl Tlangnuam veng mi vek, Ricky Laldawngliana, Ramtharnghaka, Francis Lalmuanawma leh Lalrohlua te an ni a. Mi palite hi The Mizoram Fisheries (Amendment) Act, 2022 section 6 (1) (a) an bawhchhiat avangin Fisheries Act Section No. 6(2) hmanga hrem an ni ang.
DFDO Mamit chuan luidung humhalh lai bomb hmanga beihna hi tun chinah thleng nawn tawh lo se a duh thu sawiin, The Mizoram Fisheries Act, 2022 bawhchhe lo hram hram turin mi tinte a ngen nghal bawk a ni.