Aizawl: ZPM leader Lalduhoma chuan mipui rilru-ah MNF leh Congress ni lo sorkar thar duhna a lian hle a, ZPM an sorkar chuan ramri hrula awmte hmasawnna an ngaih pawimawh tur thu a sawi.
Nimina Pukzing leh Silsury khuaa ZPM-in vantlang inkhawm an buatsaiha thu sawitu, Lalduhoma chuan ZPM chu Zoram People’s Movement a nih angin Mizoram chhung mai ni lo, tlang hrang hranga Zohnahthlak hnam zawng zawngte leh a chhunga cheng hnam hnuaihnung zawkte a huam tih a sawi a. “Tunah hian mipui nawlpui titiah chuan ‘ZPM a sorkar dawn’ kan ti tawh a ni. BJP hian sorkarna an siam mai dawnin a lang lo va, mipui rilru-ah MNF ni lo, Congress ni lo sorkar thar siam duhna rilru a lian hle a ni,” a ti.
Lalduhoma hian Pathian zara an sorkar chuan ramri hrula awmte hmasawnna an ngai pawimawh dawn a, Bangladesh nen insumdawn tawnna tur ruahmanna tha tak an siam dawn tih a sawi. He ruahmanna hi an tihlawhtling thei a nih chuan Mizoram tan chauh ni lovin, India ram tan pawh a chhenfakawm dawn a, a zar zo ber tur chu ramri hrula awmte an ni dawn a. ZPM hand holding policy nena kal kawpin hmasawnna ruhrel lian tak din theih ngei an inbeisei tih a sawi.
ZPM leader hi general secretary pahnih, BC Tawna leh JK Dawngzuala te leh Mamit bial viltu atana ruat, Vanlalsailova ten an tawiawm a. Lalduhoma hian an party-ah mi thar eng emaw zat a lawm lut bawk.