Aizawl district Superintendent of Police Rex Zarzoliana Vanchhawng chuan ruihhloin khawtlang nun a luhchilh nasa a, hei vang hian pawikhawihna pawh a thlen tam phah tih sawiin, ruihhlo do hna an bei ngawrh zual zel dawn tih a sawi.
He thu hi nimina a pisaa thuthar thehdarhtute nen an inkawmnaah Aizawl SP chuan a sawi a. Ruihhlo hluar zel do let turin hmalakna tur an duan mek thu te, ruihhlo ngaite khawlaia hnawksaka an awm lohna tur te pawha ruahmanna siam an tum thu te a sawi.
Dan pela Mizorama lut hnam dangte dap chhuak turin endikna kalpui fo chu an hmachhawp pawimawh zinga mi a nih thu leh patrolling pawh tam zawka neih an tum thute a sawi bawk.
Zawhna chhangin SP Rex-a chuan Aizawl district chhunga pawikhawihna thubuai an ziah luh zingah rukruk chu a tam thu sawiin, “Rukruk hi a tam khawp mai,” a ti.
Social media-a thu dik tawk loh pho lan awm thin chu tha lo a tih thu leh a vei thu a sawi bawk a, “Hnam leh hnam inhuatna chawk chhuak thei zawngte thu dik lo ziah thinte social media-ah hian hmuh tur a tam a, heng hi mipuiten thu lakna atana an hman chuan a fel dawn lo,” a ti bawk.