Pakistan hmarthlang lama tleirawl pahnih chu mipa nena an awm lai video tlem chu social media-a a darh hnuah thah an ni a. An pahnih hian an chhungte ve vein an thah nia hriat a ni.
He thil hi kar kal taa North leh South Waziristan tribal district inrina lai bawr khuaa thleng a ni a. An chhungten an kap hlum nia hriat a ni.
Tleirawlte tihhlum an nih chhan hi mobile video tawi tê, an rualpui mipa dang nena an awmho lai social media-a thehdarh zauh a nih vang niin police chuan an sawi a. An awmna hi hmun kilkhawr tak a ni a, chhui chiang turin police an kal nghal.
Ningani chhun lai vela he thil hi thleng kha a ni, Shaam Plain Garyom khuaah a ni a, an khua hi a Khyber Pakhtunkhwa province-a North leh South Waziristan inrina khua a ni tih police hian an sawi.
Tleirawl pahnih hi kum 16 leh 18-a upa an ni a, anmahni lanna video nia an sawiah hian an pahnih bakah tlangval leh tleirawl pakhat ve ve, anmahni ang rual vel bawk an lang a. In chhung ni lo, pawnah an awmho lai a lang niin an ram chanchinbu, Dawn chuan a tar lang.
Video hi chhui chian chuan kum liam dawn tawha lak a ni a, tun hnaiah social media-ah hian a darh thar leh niin police thuneitute chuan chanchinbu hnenah hian an sawi.
“Tuna kan ngai pawimawh ber chu tleirawl lang ve dang pakhat leh tlangval himna hi a ni a, kut an tawrh leh hmain chet chhuah vat a ngai a ni,” tiin officer chuan a sawi.
Human Rights Watch chuan Pakistan-ah hian hmeichhia leh hmeichhe naupangte chunga tharum thawhna thleng thin hi ngaimawhawm tham a la ni reng tih an sawi a. Tuna thil thleng ang, an chhungte ngeiin hmeichhia an thah hi he ramah hian kum tin 1,000 chuang an awm ziah niin an sawi.