British zaithiam leh hlaphuah thiam ni bawk Ed Sheeran chuan a hla lar, ‘Thinking Out Loud’ laka thubuai thehluhah thiam a chang leh ta.
Manhatan-a federal court chuan a vawihnihna ni turin Ed Sheeran lam hawiin thu-tlukna a siam a, mi hla copy ru-a puhna chu thu belhchian dawl lo a ni, tiin thutawp a siam.
‘Thinking Out Loud’ hi Marvin Gaye hla, ‘Let’s Get It On’ hla thluk ruk thubuaiah khin buai a ni a, US District Judge Louis Stanton chuan Structured Asset Sales LLC-in thubuai a thehluh a, ‘Let’s Get It On’ hla thluk thenkhat chu Sheeran-a’n phalna nei lova a la chhawng ni a puhna chu a hnawlsak.
Heti ang deuh tho hian tun thlatir khan Sheeran vek hian hla thluk ruk thubuai ah hnehna a lo chang tawh. Hemi tum hian a thaw huai chiang hle a, hun rei tak thubuai hlabuai chaia hun a khawhral tam lutuk te, sum leh pai tam tak sen ral ngai, rilruhah leh manganna tam bawk si laka a fihlim thei chu a lawm hle, tih a lo sawi tawh.
Eng emaw hleka zaithiam leh hla phuah thiamte’n copyright thubuai an hmachhawn fo thin chu mimal tak pawhin khamawm a ti a, hla a phuah dawn reng rengin video nen uluk taka la in, fimkhur tak leh lang tlang bawk siin, a kalpui thin. Thubuai hlabuai awm thei reng a nih vangin lo in ven lawk nan video nen a record thlap.
Thubuai hmasa a hmachhawn hma lawk khan a laka hla thluk ruk thubuai siam a nih chungchanga thiam loh chan tir a ni a, hremna a chunga lekkawh a nih chuan damchhunga rimawi leh a kaihhnawih reng reng siam leh buaipui tawh loh a tum hial tih thlengin Sheeran hian a sawi.