US court chuan Chicago sumdawng, Tahawwur Rana chu kum 2008-a mi firfiakten Mumbai khawpui an beihna kaihhnawihah India-a thawn luh a remti.
Rana hi kum 2011 khan India-a sumdawnna khawpuia mi 166 zet thattua puh Islamic hel pawl a thlawp avangin thiam loh chantir a lo ni tawh.
Mahse, he beihna thlenna turin a pui nia puhna takah erawh thiam loh chantir a ni lo.
Sumdawng hausa hi India chuan kum 2020 daih tawhah khan a rama thawn lut turin a lo ngen tawh.
Rana hian an puhnaah hian a pha vek a, US sorkar pawhin a thlawp, India-in an rama thawn luh a dilna pawh a khing let bawk.
Thawhtanni khan court chuan thawn chhuah hi a remti ta a. Court chuan Rana hi India-ah hian pawikhawih tuma mi phiarna, firfiaka chetnaa inhnamhnawihna leh mi thahnaah thubuai a nei a, heng thilte hi US leh India inremna neihah hnial theihna a awm lo niin a sawi.
Court-in remti tawh mah se Rana hi US-ah a la tang chhunzawm rih dawn a, Secretary of State to India-in thutlukna tawp chu a siam dawn chauh a ni.
November, 2008-a mi 160 chuang thahnaah khan mipa 10-in rel station, khualbuk, cafe leh Jewish centre beiin an kap a, bomb nen an che bawk.
Indian thuneitute chuan Pakistani, Canadian khua leh tui, Rana hian a naupan laia a kawm tawh, David Coleman Headley nen thil ruahmanin Pakistani hel pawl, Lashkar-e-Taiba (LeT) chu he beihna thlen tur hian an pui niin an puh.
Prosecutor-te chuan kum 2006 khan Rana hian Headley-a hi Chicago-a hmunpui nei a sumdawnna, immigration services firm chu Mumbai-a pisa hawn a phalsak a, hetah hian Headley hian kum 2008-a beihna thlenna turin mihring leh remchang a dap ta niin an sawi.
Rana hian Headley-a hi a firm aiawhtua dahin chanchinbu pisa hrang hrangah fakna an chhuah theihna turin hmanruaah a hmang niin an puh bawk.
Mumbai beihna avanga US-a kum 35 chhung tang tura tih, Headley-a hian kum 2011 khan Rana-a lamtang lo zawngin thil a sawi tawh bawk.
Rana-a aiawha dingte chuan hetih lai hian Pakistani military school a kalpui thin, Headley-a hian a bum a, kawng dik lovah a hruai niin an puh let.
Kum 2011 khan Chicago-a thuremtute chuan Rana-a hi LeT thlawpa puhin thiam loh an chantir a; mahse, Mumbai beihnaah hian a taka che ve viau anga puhnaah erawh a fihlim thung.
Kum 2013 khan kum 14 tang tura hrem a ni a. Kum 2020 khan Covid-19 a kai avangin chhuah lailawk a ni.
India-in an rama thawn a dil hnuah man nawn leh a ni.