India-a Supreme Court chuan Tamil Nadu-a lar leh sawi hlawh tak, bawng chhaih kawlha infiamna, Jallikattu an tih chu kalpui zel a phal.
He infiamna hi kum 2006 khan court-in a lo khal tawh a; mahse, kum 2017 khan state sorkarin dan a siam that hmangin phal leh a ni.
People for Ethical Treatment of Animals (PETA) hovin ran humhalhtu pawl che chhuakin court sang berah hian phalna hi an khing a ni.
Supreme Court chuan Ningani khan thutlukna puangin India danpui bawhchhiatna a awm lo tih a sawi.
Judge panga thutna, Constitution bench-in thu hi ngaihtuahin Tamil Nadu-in dan hmanga Jallikattu a humna chu a kaltlangpui ta a ni.
“Ram rorelnain Jallikattu hi Tamil Nadu-a hnam thilah a puang a, court-in he thilah hian thlirna dang a lo nei thei lo,” a ti.
Tamil Nadu bakah hian court chuan dan tlawhchhana Karnataka leh Maharashtra-a bawng kawlh chhaih leh hetianga kûtpui hman tha lo tihna thu lut pawh a hnawl.
Kum 2,000 chuang lo kalpui tawh Jallikattu hi tun lai khawvel thlenga infiamna la kalpui zinga upa ber pawl a ni a, Tamil-a thlai seng kût, Pongal laia neih thin a ni.
Jallikutta-ah hian bawngte hi an khungna huang atanga chhuahin a lo sualtute chuan an thlukvum laiah an lo inman bet a, metre 15-20 emaw, vawi thum a zuan thlenga inham tang thei chuan lawmman an dawng thin a. Tumah inham tang zo an awm loh chuan bawng chu a chak tihna a ni thung.
Tun hma lamin bawng thinrim hian a entute chil chiam a lo nei tawh thin a. Mi tam takin hliam an lo tuar tawh thin.
Ran dikna chanvo humhalhtute chuan ransa tihduhdahna niin an sawi a, a tantute chuan hnam thil a nih thu an sawi ve thung thin a. Hetianga an hman bawngte hi uluk taka enkawl niin a chi pawh a hrana hetiang atana thlahtir thlap a nih zawk thu an sawi thin.
Tamil Nadu-a Madras High Court chuan kum 2006 khan a thlirtute a beih avangin a khap a.Kum 2014 khan Supreme Court pawhin ran sawisakna kaihhnawihah a khap bawk.
Tamil Nadu sorkar chuan kum 2017 khan mipui nawrna avangin khapna a hlip a. Sorkar hian dan a siam danglam ta bawk.
Dan thar hi PETA leh pawl dangin court-ah khingin dan lo leh dik loh thu an thlen.
Supreme Court-a ngaihtuah a nih lai hian Tamil Nadu sorkar chuan Jallikattu chu ‘intihhlimna a ni lo va, hnam chanchin, hnam kalphung leh sakhuana thil’ a nih thu a sawi.