Aizawl: Mizoram Rural Bank Chairman V Jaya Chandra chuan MRB branch thar 102-na tur chu nimin khan Salem vengah a hawng.
Branch thar hawnna inkhawm hi MRB Manager C Ramdinsanga’n a kaihruai a, Chandra chuan Salem veng Branch chu branch 102-na a nih thu sawiin, veng chhung mai bakah veng thenawmte tan tangkai taka hman a nih a beisei thu leh harsatna a awm a nih chuan head office atanga a theih anga buaipui nghal zel a nih tur thu a sawi.
Salem veng Local Council Chairman K Lalrinmawia chuan an veng chu veng thangduang tak, sorkar leh kohhran hmun pawimawhte bakah sumdawnna hmun atan mi tam takin an hman chhoh mek a nih thu sawiin, an mamawh em em MRB hotute hnena an dil tihhlawhtlina a lo awm ta chu MRB hotute chungah Salem veng khawtlang aiawhin lawmthu a sawi.
MRB Branch thar hawnnaah hian veng chhung local council, NGO hrang hrang leh bank officer leh staff eng emaw zat an tel a ni.