AZL: Central YMA hruaituten nimin khan Manipur atanga an sahimna zawnga Mizorama tlan lut, Kolasib district chhunga awmte an tlawh a, YMA-in raltlante puala vehbur a khawna sum tlingkhawmte chu an sem chhuak nghal a ni.
Raltlante tlawha fehchhuak Central YMA hruaitute hian Kolasib district chhunga raltlan awm khawmna camp 12 chu team thuma inthenin an tlawh a, raltlante nen inkawmin an dinhmunte an sawi ho.
Heng hunah hian Central YMA President Lalngheta chuan thu sawiin, Mizo fate inpuiah Mizorama thlamuang taka awm turin a chah a, raltlante chu riltamin an awm dawn lo tih a sawi a. Mizoram mipuite pawh an unaute dinhmun harsa takah an awm a ni tih hriatpui reng tur leh an theih ang anga anmahni tanpui tura pen chhuaka che chhuak zel turin a ngen bawk.
Central YMA hruaitute hian branch YMA-ten an huam chhunga raltlante tana vehbur an khawnsak leh Mizoram dung leh vanga mi inphal tak takten raltlan puala tanpuina an pek sum tling khawmte an sem a nghal a. Mihring 100 chuang awmna camp-ah Rs. 15,000 an pe a, mihring 100 hnuai lam awmna camp-ah Rs. 10,000 theuh an pe thung a ni.