Mizo Idol-2022 runner-up C. Vanlalroluahtumi (Vli) music video hmasaber tur ‘Lungpui nghet’ chu zanin May 19, 2023 atang hian MDM YouTube channel-ah thlir leh ngaihthlak theiha chhawpchhuah a ni ang.
‘Lungpui nghet’ hi Hlimhlimi sak ‘Ka hlan a che’ tih leh Lalduhsaki sak ‘I fak ang u’ tih hla te pawh lo phuah tawhtu Nipuii Varte phuah niin, hla phuah leh lehlin lama mikhual lo tak T Laldintluanga’n a thluk a siam thung.
Mizo Idol star video hmasaber tur hi a Producer Mizo musician tha zing ami, drummer Zothana (Zta Khawlhring) atang ringawt pawhin an ti mai mai lovang tih a rin theih a. Zaia puitute lah zaithiam hrang hrangin eng hla pawh sa se nalh em em maia lo pui thei zel thin Bible Society (BESY) zaipawl member Rempuii, Tetei leh Effie te ngat kha an ni bawk a. Amah Vli zaithiam zia chu tumahin kan la theihnghilh hman lovang.
Vocal recording chu HC recording kutchhuak niin, music erawh Edensvine Records (Zta Khawlhring) kutchhuak a ni thung a. Guitarist Philip Keys; Bassist Rema; Keyboardist Vistea leh Drumer Zta Khawlhring ten live music hmanga an rem niin video erawh Moonshine Studio kutchhuak a ni thung.
Vli hi Mizo Idol Season 7-ah khan mipui hip ber pawl leh tantu ngah tak a nih kha. A mah ang bawka thiam T Vanlalhmangaihi kha a vannei zawka a tan avangin Vli chu pahnihna a ni ta a. Thawm a neih zui vak loh hnuah a video hmasaber lo chhuak tur hi mi tam tak nghahhlelh a ni ngei ang.