Prime Minister Narendra Modi chu G7 thutkhawmah tel turin Zirtawpni khan Japanese khawpui a thleng a, Quad hruaitute intawh khawmah a tel bawk ang.
Modi-a hian thutkhawmah hian khawvel ram lian hruaitute hnenah khawvelin chona a hmachhawn mek a thlir dan leh a huhova hmalak dan tura a ngaihdante a thawh dawn a ni.
Tun tuma Modi-a zin chhuak hian ram pathum a tlawh dawn a. Japan bakah hian Papua New Guinea leh Australia tlawhin hengah hian tum 40 chuang mi dang nen an inkawm ang.
Summit-ah hian ram hruaitu 30 dawnte nen an inkawm dawn a, a mi mala kawm a nei nual bawk dawn niin thuneituten an sawi.
“G7 ramte nena ngaihdan sawiho hi ka phur tawh a, khawvelin chona kan hmachhawn mekte hi sawihova a huhova hmalak a ngai a. Hiroshima G7 Summit neih chhung hian ram dang hruaitute nen a mi mal pawhin kan inbia ang,” tiin a zin chhuah hmain Modi hian a sawi.
“Tun tum G7 Summit-a ka tel tur hi India-in G20 president dinhmun a chelh kum a nih bawk avangin awmze nei tak thil a ni,” a ti bawk.
Prime minister hi thlawhna tumhmunah Japanese leh Indian thuneitu sangten an lo dawngsawng.
Modi-a hi Hiroshima khawpuia May 19 leh 21 chhunga khawvela ram dinhmun tha pasarihte intawh khawma tel tura sawm a ni a. Khawvelin chona a hmachhawn hrang hrang – eibar, lei tihthatna leh energy security chungchanga a ngaihdante a sawi chhuah beisei a ni.
G7 an tihte hi Japan, United States, United Kingdom, France, Germany, Canada leh Italy bakah European Union te an ni.
Japan atang hian Port Moresby, Papua New Guinea a pan ang a, May 22-ah Prime Minister James Marape nen Forum for India–Pacific Islands Cooperation (FIPIC) an thleng dun ang.
May 22 leh 24 chhungin Australia a tlawh leh bawk ang.
Quad summit hi Sydney-a neih tura ruahman a ni a; mahse, US President Joe Biden-a’n Australia tlawh hun a sawn avangin Hiroshima zawkah nghah a ni dawn a ni.
US, India, Australia leh Japan atanga Quad hruaituten thawhhona tur hrang hrang an sawiho dawn a. Technology, infrastructure tha zawk, khawvel huap hriselna, sik leh sa inthlak, tuipui venhimna leh thil dang dang an sawi ang.
Modi-a’n Papua New Guinea a tlawh tur hi Indian prime minister zinga a hmasa ber tur a ni.
“Pacific Island Country (PIC) 14-ten summit pawimawh tak, FIPIC-a tel tura sawmna an pawm vek hi a lawmawm hle a ni,” a ti.
FIPIC hi kum 2014-a Fiji a tlawh tuma din kha a ni.
Australia-ah hian Modi-a hian Australian Prime Minister Anthony Albanese a kawm ang.
Australia-ah hian sumdawng pawla an hruaitu leh CEO te bakah Sydney-a Indian awmte a kawm bawk ang.