Mitinin kan hria, kan thenawm Manipurah chuan vawiin niah hian chi leh chi, hnam leh hnam an indo mup mup mai a. An ram chu tah leh hathialna in a nuai mek. Meitei leh zohnahthlakte chuan insuatmang thak duh ve ve in hma an la mek a ni. An hma lam hun chu a awhawm lo khawp mai.
Manipur hi ram nuam leh mawi, ei leh bar tharchhuahna kawng lama ram tha leh awhawm a ni a. Rice bowl of northeast pawh ti ila kan sawi sual kher lovang. A mihring chengte pawh an hnufual lem lo. Zirna lamah pawh an hniam lo. Mahse, tunah chuan chenna tura ram awhawm a ni ta hauh lo mai.
Engvanga heti tak maia lo buai ta mai nge tih hi thui tak sawi tur a awm lem lo. An ram chu kum tam tak kalta atang khan hnam leh hnam, chi leh chi rilru intuh a kal chho laklawh a ni a. Chi leh chi inkarah nasa taka inthliarna a awm reng a. Hleih neihna in an ram an enkawl a. A ram mipui population a tam ber Meiteite chuan an chenpui tribal te chu an harsatna a dawmkan lam aiin an ram budget 80% zet chu anmahni chenna bik Imphal phairuamah englai pawhin an vawm lut a. Sawrkar hnaah nise tlangmi tan chuan beisei a har khawp mai. Hna reng reng chu Meitei chan tura ngaih a ni deuh mai a. Chutianga hleih neihna chuan tribal-te rilru englai pawhin a tina reng a. Hlim taka helai rama cheng ho thei reng tur chu an inkarah nasa takin khi a awm reng a. Chu khi chu a nasa tual tual a. Tribalte hnawk tihna thinlung lian chho zel chuan umdarh vek duhna thinlung a ti lian a. Mahse, chu rilru chu tribal-te chuan hai bik lovin anmahni dinkhawchhuahna an buaipui ve lo thei ta lo a ni. Chumi nghawng chu mipui indona (civil war) ah a in let ta a. An ram chu nitin tah leh hathialna in a nuai ta mek a ni.
Mihring hi inhnuaichhiah a, lian zawk leh te zawk awm reng tur kan ni lova. Kan awmna rama hlim tak leh lungawi taka kan awm theihna tur hian rorelna a pawimawh a. Chu rorelna azir chuan ram nuam emaw ram hrehawm emaw a lo piang mai a ni. Kan ram pawh hian zir tur thui tak he Manipur buainaah hian kan nei a. Tute bik emaw hlamchhiah, hnuaihnung tura kan hnutchhiah chuan a er let hun a awm lo thei lova. Kan ram hi nuam ti taka awm kan duh chuan Manipur ram in enkawl dan fuh lo hi inzir nan i hmang ang u.