South Africa-a hmun hriat hlawh tak, Table Mountain-a ram kang chuan University of Cape Town campus pawh a thleng tep ta a, zirlai za tel hmun hima suan chhuah a ni.
Politician Cecil Rhodes-a hriat rengna hmun atanga Pathianni tuka a kang tan atang khan a inman kai chak hle a, thingpui dawr a kang chhe tawh.
University historic library leh a building dangte pawh a tichhe nual.
Helicopter pali hmangin thelh hna thawh a ni.
South African National Parks chuan zing dar 9:00 (India-a chhun dar 12:30)-ah kangmei a chhuak tih an hria a. Khaw ro leh thing ro lutuk avangin a kang kai chak hle niin an sawi.
Thli a thaw reng bawk si a, a inman kai chak zual hle a, ni thum chhung vel tal thelh hna thawh a ngai.
“Kan chhui tawh chinah chuan mei tuah tihmih that loh vang a ni,” an ti.
Kangthelhtu mi 120-in a thelh hna an thawk a, kang hliam pakhat chu damdawi inah hruai a ni tawh.
University of Cape Town-a Jagger Library leh hriat hlawh tak, Mostert’s Mill pawh a kang chhe nual.
“UCT zirlaite chu emergency services support staff-ten hmun himah an hruai chhuak,” tiin university chuan Twitter-ah a tar lang.
A bul hnaia chengte chu meikhuin a bawh nasa hle a, kawngka leh tukverh khar tura tih an ni.
Table Mountain National Park-a lawn (hiker)-te leh lirthei khalhtute pawh tlang chhuahsan vek tura hriattir an ni.