Aizawl: Rajya Sabha member K Vanlalvena chuan rorelna hmun khat hnuaia Zofate awm chu a tir atanga MNF-in a tum ngar ngar a ni a, India nena inremna a lo awm tak avangin Zofate insuihkhawm duhtu ZORO movement a lo lian ta tih a sawi.
ZORO huaihawta Vana Pa Hall-a Zofate Inkhawmpui Lian hun hnihna Inrinnia neihah K Vanlalvena chuan ZORO chu Zofate funkim thei bertu a nih thu sawiin an hmalakna a chhuanawm thu a sawi a. Inpumkhat dawn chuan buaina leh arsatna tawh chang a awm a tul a, chu chuan inhmangaihna leh inremna, tawng inhriat tawnna a thlen thin tih sawiin, “Buaina avangin Zofate kan inhnaih sawt thin a, min tipumkhat thin a ni. Kan inhmangaih tawn phawt chuan min awp mektute hian kan inpumkhatna leh rorelna pakhata kan awmna tur hi min dal hauh lo ang. Hei hi khawvel history-ah pawh a chiang em em a ni,” a ti.
K Vanlalvena chuan pipute kha hnam mawl leh hnuaihnung atanga lo chhuak an nih loh thu a sawi a. Hnam changkang tak hnuaia lo awm tawh ngei an ni tih hi darkhuang leh thiam thil te atangin a chiang a. Thlang an lo tlakin an khawl an keng lo mai a ni tiin, “Zofate hi kan chenna a lo hran tak avangin kan tawng a lo danglam ta a. Tawng thuhmun loh avangin thlah khat kan nihna a bo lo a, hnam dang kan ni hek lo. Kan lungrualna tur leh kan inzawmkhawm theihna tur a nih phawt chuan kan hnam hming chu engpawh nise a pawi lo,” a ti a. Hnam hming leh hmingte pawh thlak a nih fo thu leh Zofate hi hmun hrang hrangah awm ni mah se, Kristian an ni deuh vek avangin pumkhat an nihna a tilang a, Mizo hnam hi Pathian thutak avangin nuai bo theih a nih loh thu a sawi.
Zofate Inkhawmpui Lian hun hnihna hi Moses Lalramchhana, Vice President, ZORO-in a kaihruai a. Political party hrang hrang aiawhten thu an sawi bawk.