Aizawl: MNF Adviser Dr R Lalthangliana chuan politics-ah rilru dik leh hrisel put chu a harsa lai ber a ni a; malsawmna dawng tur erawh chuan rilru dik leh hriselna put ngei ngei a ngaih a thu a sawi.
Thawhtannia Convention Centre, Lungleiah MNF Sub-Headquarters Lunglei huaihawta thawktute infuih tharna leh mi thar lawm luhna hun hmanpuitu, Dr R Lalthangliana chuan party thenkhatin an beihnaah Zoramthanga kaihhruai MNF sorkarin engmah ti lo ang maia an chhuah chu pawm loh thiam tur tih sawiin, “Kan thil tih leh hmasawnnate hi kan mitin kan hmuin kan hre vek. Hei hi party ngial nghet, MNF leh Congress chuan kan sawi ngai lo. A ti thintute hi rilru hrisel lo, party ngial nghet lote an ni,” a ti.
Kum 30 zet MLA a nih ve tawh chhungin tuna chief minister, Zoramthanga kaihhruaina hnuaia MLA-te an inlungrual em em a, tun ang tluka bial vil tha leh taima MLA an awm a la hriat ngai loh thu sawiin, “Pathian leh mipui zarah Pu Zoramthanga kaihhruaina hnuaiah MNF hi kan sorkar leh ngei dawn a ni,” MNF adviser-in a ti.
Health minister hian tuna India ram health minister-ah hian a senior ber a, India rama commerce & industry minister meeting-na thlengin a tel zing ber a nih thu a sawi a. He ta an sawi zin ber chu state tinah hmasawnna leh sorkar hna lak kawngah tun thlengin Covid-19 khan a la nghawng zel a. Mizoramah pawh Covid-19 do nan khan budget-a awm lo, cheng nuai hlir nuai singhnih chuang hman niin health minister a nihna angin an ziah tel loh pawh a hmuh nual thu a sawi.
MNF Sub-Headquarters Lunglei Vice President C. Chawngthanmawia kaihhruai inkhawmah hian Dy. Govt.Chief Whip Lalrintluanga Sailo, MLA leh Lunglei HPC Vice Chairman Lawmawma Tochhawng bakah Sub-Hqrs Lunglei President Vanlalhmuaka ten thu an sawi bawk.