Aizawl : Mizo Students Union General Headquarters chuan nimin khan HSSLC Examination 2023 result a Stream pathum (Arts,Commerce,Science) a Mizo top 3 te lawmpuina leh MSU Special Award hlanna hun chu Cultural Centre Cum Auditorium, Vaivakawnah an nei a, Pu K.Lalrinliana, Hon’ble Minister chuan khuallian niin a hmanpui a, Khualzahawm ah Pu K.Laldawngliana niin Pu John Lalpeka, Proprietor 3:16 Plan Solution chu Uaptu a ni. Programme hi Vice President Pu Laldinsanga’n a kaihruai a, Zo Career Solutions leh LEDSE Department atangin zirlaite fuihna thu ngaihthlak a ni bawk.
Khuallian Pu K.Lalrinliana chuan ‘ Vawiin ni a zirlai kan lawmpuite leh program hmang tura lokalte hi in vannei takzet a, tunlai thiamna hrang hrang leh material kimchang tak hmangin lehkha inzirthei a, sang tak thleng turin duhsakna ka hlan che u a. Tuna zirlai kan lawmpuite hian Mizoram tan enge ka tih theih ang ti in lehkha zir sauh sauh turin ka chah che u a ni.’ a ti a. Pu Rintea chuan Pathian in Zofate tan hun a ruat a, tuna kan tawrhna hi inpawhna tha lehzual leh Zofate inpumkhatna a kawk a, hmun hrang hrang a chengte unau kan nihzia alang a, hnam movement hi kan ngaihtuah reng a ngai a, ngaihtuahna fimtak kan hman reng a ngai a ni tiin zirlaite a chah.