Aizawl: New Delhi-a châm mek, Chief Minister Zoramthanga’n Prime Minister Narendra Modi bakah union minister dangte a kawm a, Mizoram mamawh hrang hrangte a thlen.
Zorama hian Pathianni khan prime minister, Union Finance Minister Nirmala Sitharaman leh DoNER changtu Union Minister of State BL Verma te a kawm a, nimin khan Road Transports & Highways changtu Union Minister Nitin Gadkari chu a kawm leh a, sorkar laipui hotute hnenah hian Mizoram mamawh hrang hrangte thlenin, sorkar laipuia Mizorama hmasawnna hna thawhna tur project thehluh hrang hrangte a bawhzui a ni.
Chief Minister Zorama hi Inrinnia NITI Aayog Governing Council meeting neihah a tel a, Pathiannia India parliament building thar hawnna inkhawmah a tel bawk a ni.