India khawpui, Delhi-a police-te chuan mipa kum 20 mi, vantlang hmuha a thiannu kum 16 mi nasa taka vita thattua puh chu an man.
Video darhah chuan he pa hian a thiannu hi vawi tam tak a vit a, a lu chu lungin a deng bawk.
Video hi a darh hnuah India ram pumah dem a hlawh a, a chetna bul lawkah hian mi kal leh vei vel an awm reng tih a lang bawk.
Police chuan he mite pahnih hi an inngaizawng niin an sawi a, Pathiannia a thah hma khan nasa takin an inhnial tawh niin an sawi bawk.
Hmeichhia zawk hi a thian fapa piancham lawmnaa a kal beih a nih hnu police hotu lian, Ravi Kumar Singh chuan news agency ANI hnenah a sawi.
A titu hi Sahil-a niin an thenawm, Uttar Pradesh-a Bulandshahr district-ah man a ni.
Singh chuan chhui zui mek a ni a, thil thui tak sawi theih an la nei lo tih a sawi.
A video hi a darh hnuah social media-ah thinrim an tam hle.
Hashtag hmanga ‘Delhi murder’ leh ‘Delhi crime’ tih chu Twitter-ah a lar nghal hle a. Thil thlenna hmun, Shahbad Dairy tih pawh a lar hle bawk.
Delhi Chief Minister Arvind Kejriwal chuan inthahna hi ‘a lungchhiatthlakin a vanduaithlak’ tih thu tar langin ‘mi sualte hian hlauh an nei lo va, police pawh hlauhna an nei lo’ niin a sawi.
“Thil sual ti lai CCTV-ah a lang reng a, mi tam takin an hmu a, tumah an inrawlh lo. Delhi hi hmeichhia leh hmeichhe naupang tan a him lo tak zet a ni,” tiin news agency ANI chuan Delhi Commission for Women chief Swati Maliwal-i sawi a tar lang bawk.
National Commission for Women Chairperson Rekha Sharma chuan Delhi mipuiten ‘thil an ngaihzamzia a lang’ niin a sawi bawk.
“A bulah mi an awm teuh va, tumahin puih an tum lo. Thubuai hi fast-track court-ah ngaihtuah a ni ang a, a rang thei ang bera tihfel a ni ang,” a ti.
India-ah hian tuna mi ang deuhva mi tamna laia pawikhawihna hi a lo thleng fo tawh thin a. A bula awmte hian inrawlh leh thelh aiin en chunga video-a lo lakte an ching a, sawi pawh a hlawh hle thin.