Tunkar thawhlehni khan Pu Tawnluia, deputy chief minister chuan Aijal club a Horticulture fair a hawnnaah thu sawiin Mizoram chief minister chuan mau a ngaihpawimawh thu a sawi a. Mizoram economy khaichhuahna atana tangkai leh langsar ber tur chu mau hi a ni a ti. Ram development hi vawilehkhata kal duak thei a ni lova. Nghah theih a ngai, dawhthei taka nghah ngai a ni a ti bawk.
Mau chunghang hi kan chief minister hian sawrkarna a siam hmasak hun lai atang tawh khan a sawi thin a. Tuna sawrkarna an siam nawn leh hnuah pawh a tir phat atangin an buaipui a. A chi kuitiah atangin mipui titi a ni.
Mau chin hlawkzia chu IAS te pawhin an hna bansanin an la ching duh ang a ti hial anih kha.
Mahse Mau chin hi a bul atangin a fuh lo nge a buai chho nuai nuai a. Midangin a chi an supply ve remchang hauh lo turin supplier in sum siam nan an hmang nghal bawk a. An chinna hmun lamah opposition MLA te an tlan a. An enfiah chho a. Dik lo tam tak hmuin an insawi a. Sawrkar chuan hmun hrang hrangah a chin tir a. Mau ching ho chu sawrkarin sum leh pai pawhin nasa taka a tanpui an ni. Sawrkar hian mau atan hian vaibelchhe tam tak a seng tawh.
Mahse kum 5 dawn a liam tawh hnuah pawh mau hi a chingtuten an hlawk pui tâk viau thawm hriat tur a awm lova. An chin tan tirh a ri hluai chu a ri zawi telh telh a. Ram economy nghawng chu sawi loh, kan CM pawh hian inthlan hmachhawn nana aupui atan a duh chiah tawh lo zawk nge ni, tunhnaiah mau hi a sawi ta meuh lova. Thawhlehni a Dy CM sawi hi hriat tur awmchhun a ni leh mai awm e.
Hetiang anih mek lai hian sawrkar lai a cabinet minister te leh rulling party MLA ten mau an sawi hriat tur a vang em em bawk. Mau chin hi a hlawhchham nge an hlawhtling viau tih pawh hriat a ni hek lo.
Uluk taka ngaihtuah chuan chief minister berin a buaipui chu hlawhtling awm tak a ni a. Mahse thawm a reh danah hian an hlawhtling vak lo a ang khawp mai. Sawrkarna kengtu in kum heti zat an buaipui a, hlawhtlinna thawm hriat tur awm hauh lo chu a mak a. Hei hian sawrkar lai mekte hmalakna chu nasa takin a mualpho pui tih hi mipuite hian kan hriat a tha hle a ni. Engpawh hi buaipui ila, kan rilruah hlawhtlinna lam aia sum hlep tur ringawt kan buaipui hmasak chuan hlawhtlinna a awm ngai lo tih hi i chiang tel pah ang u.