Kum 15 chhungin Aizawl Traffic Police-in lirthei dan bawhchhia nuai khat chuang an man a, an sum chawi tlingkhawm chu Rs vaibelchhe ruk chuang a tling.
Nimin khan Aizawl Traffic Police-te Vanapa Hall-ah an intawkkhawm a, he huna an tar lan danin, kum 2007 atanga 2022 chhungin lirthei dan bawhchhia 1,73,883 man an awm a, chung mite sum chawi tlingkhawm chu Rs 6,09,64,647 a tling a ni.
Lirthei dan bawhchhia man tawk zinga tam ber chu lirthei ke hnih nei an ni a, man tawk zawng zawng atanga za zela 57 a tling a, a dawtah LMV niin taxi chu pathumna a ni a; lirthei bungraw phur lian chi chu palina niin, bus chu dan bawhchhe man tam zinga pangana a ni.
Kum 10 chhung, 2013-2022 chhungin lirthei khalhtu dan bawhchhia mi 1,32,400 man an awm a. A dah lohna tur hmuna lirthei dah man tawk an tam ber a, za zela 20 a ni a. A dawtah dobey signal niin, dan bawhchhe dang an mante chu license keng loa lirthei khalh chhuak, lirthei din phal lohna hmuna ding lui, rui chunga lirthei khalh leh helmet khum loa lirthei khalhte an ni.
Traffic unit-ah hian MRP hi mi 270 awm tura tih a nih laiin mi 146 chauh an awm mek a, post ruak hi 123 awm a. Unit danga he unit-a awm mek eng emaw zat awm nena belh khawmin Aizawl Traffic Police-ah hian thawktu mi 334 an awm mek a ni.