Aizawl: Er. Lalrinawma, Minister, AH & Vety, Sericulture, Excise & Narcotics, etc., chuan nimin khan a bial chhung khua Chhiahtlang Venghlunah Health Clinic Centre thar a hawng a, chawhnu lamah Chhiahtlang Higher Secondary School-a zirlai hlawhtlingte lawmpuina hunah khuallian niin a hmanpui bawk.
Health Clinic Centre hawnnaah hian Minister chuan, eizawnna, hriselna leh zirna te chuan a rilru a kap lian ber reng a, hmalakna pawh an kalpui tam tih sawiin, a bial chhunga mipui zaa sawmsarih panga vel ten nitin hnathawka an Lo lam an pan thin avangin a lo nawmsak zual nan an feh kawng kan lai nasa hle a, MLA Fund kan hman nasat berna pakhat a ni, a ti. Tin, hriselna lamah hma kan sawn theih nan hma pawh kan la nasa a, kan Sub Centre zawng zawngte Health & Wellness Centre ah kan hlangkai vek tawh a, Health & Wellness Officer ten an thutchilh nghal veka, an fel hlawm em em a, hripui dona kawngah pawh an thawhhlawm hlawm hle. Kan thlamuanpui thin hle a ni. Clinic Centre pawh hmun engemawzatah kan hawng tawh a, an tangkai em em vek mai a ni. Vawiina kan hawn clinic pawh hi Chhiahtlang North mipuiten tangkai taka in hman kan beisei a mamawh in neih ang ang pawh a theih ang angin kan ngaihtuah dawn a ni. Hetiang hmunhma tha kan neih theih nana Chhiahtlang North Village Council te inpekna hi a entawn tlak hle a, an chungah lawmthu ka sawi a ni, a ti.
He hunah hian Dr. Lallawmkimi Chhakchhuak, Serchhip District Immunization Officer chuan clinic hnathawh dan tlangpui a sawi a, sub centre anga ngaih an ni lo va, sub centre hnuaia service an pekte a pek ve vek theih nain sub centre hnuaia hnathawk an ni, hei vang hian anmahni pualin damdawi leh hmanraw mamawhte supply a ni lo va, sub centre note an ni th a sawi.
Chhiahtlang North Health Clinic hi thawktu health worker pakhat leh helper pakhatin an thutchilh ang a, an hnuaiah ASHA pathum an awm bawk ang.
He Centre building hi Chhiahtlang North VC ten NH 54 Compensation sum an dawn hmanga an sak a ni a. A buildingah hian Bazar, Chhiahtlang North VC House leh Health Clinic Centre te an awm dawn a ni.
Hemi hnu hian Minister hian Chhiahtlang Higher Secondary School-in an zirlai hlawhtlingte lawmpuina hun an School-a an buatsaihah khuallian niin hun a hmanpui leh a.
Minister hian thusawiin, Chhiahtlang Higher Secondary School in vawiin thlenga tluang taka a kal theih nana lo bei thintute chungah lawmthu a sawi a, zirlai hlawhtling tharte a lawmpui thu a hrilh a ni. School building thar an mamawhna sanzia a hriatpui thu sawiin a sakna tur sum hi a dap kual nasa tawh hle tih a tarlang a. Kan fund beisei te kan nghah mek lai hian a bul hi MLA Fund cheng nuai thumin lo tan phawt mai ila a tha ang, tiin MLA Fund chhuak hmasa ber atanga a building bul tanna tur a pek tur thu a sawi a ni.
Pass lawmna inkhawm hi C. Lalrawna, Chairman, School Managing Board in a kaihruai a, Lalawmpuii Ralte, Principal-in school report a pe.