AIZAWL: Lunglei High Powered Committee (HPC) kaltlanga Lunglei khawpui chhunga UD&PA leh Lunglei Police hnathawh kal mekte chu nimin khan HPC Vice Chairman Lawmawma Tochhawng hovin enfiah an ni.
UD&PA hnuaiah hian HPC kaltlangin Lunglei chhunga retaining wall rawng hnawih, side drain siam leh repair hna, footpath siam that leh footpath railing siam leh repair hna thawk leh tura ruahmanna siam fel a ni tawh a. Nikum sorkar kum 2022-23 chhung khan heng hna hrang hrang atan hian HPC Rs. nuai 66.695 sen niin a chhunzawm zel nan kumin hian Rs. nuai 71 dah leh a ni a. Hemi sum hmang hian hna 24 hengte – retaining wall rawng hnawih hmun 13-ah, side drain siam hmun hnihah, side drain bula PCC Pavement siam hmun rukah, footpath leh hand railing siam that hmun hnihah leh Ramthar Sub Centre hnuaia chequered tile step siam hna te thawh leh tur an ni.
Inspection-ah hian HPC Vice Chairman hi DUDO Lunglei C. Sawihlira leh UD&PA hnuaia JE T. Ramropuia leh R. Lalnunsanga ten an tawiawm a. Lunglei chhunga nikuma hnathawh tawhte leh kumina thawh turte an enfiah a. Hnate hi Lunglei thang zel atan a pawimawh takzet thu sawiin Lawmawma Tochawng chuan tha taka thawh ngei an nih theihnan UD&PA hotute chu uluk taka lo vil tur leh harsatna an neihte a hnenah thlen vat thin turin a chah a ni.