Nupui pathum a nei tawh a, a tluang lo. A tawpah inthenna in a umzui thin. Mahse, Tom Cruise hian ‘someone special’ a melh reng tho a, tawnfuh ngei pawh a inring.
Tunhnai khan Formula 1 Gran Prix-ah pop star Shakira nen inhaw lem lo taka an inlanna video leh thlalak darh huk khan an inkar sawizawm nghal chat a ni lo thei lova, Mission Impossible star hian a ngaihven zui hle a sawi a ni bawk nen, Miami khawpuia thil thleng kha media lian te titi tui ber a ni.
Hollywood superstar hian May 9, 1987 daih tawh khan a nupui hmasa ber Mimi Rogers nen ‘Tiam tlat E’ an lo ti tawh a, an daih rei lo. February 1990 khan kum thum an inneih hnu-ah an in then.
Rogers hnu-ah Cruise hian December 24, 1990 khan filmsta lar tak Nicole Kidman chu nupuiah a nei leh a, ani nen pawh hian an tluang zui viau lem lova, 2001 khan an inthen.
A vawithumna ni turin November 2006 khan filmstar lar Katie Holmes nen an innei a. Fanu duhawm tak Surie an nei. Hlauhthawn ruk ang ngeiin, an inthen dawn hnaih lamah nupa inkar boruak a chhe zui viau a, an inthenzui deuh nghal mai.