India-a rel pathum chetsualna lian tak a thlen atanga ni nga a liam hnuah pawh thi mi 288 zinga ruang 80 chuang chu tute nge an nih hriat theih a la ni lo.
Odisha-a Zirtawpnia chetsualna thlengah hian mihring phur rel pahnih leh bungraw phur rel pakhat ding lai an insu a ni.
Mi 1,000 chuang damdawi inah hliam tuara lak an ni a, chhungkaw tam tak chuan an chhungte chinchang an la ngaihven zui reng a, an la inhmu lo.
Tun tuma rel insutna thleng hi tun kum zabi kal meka India-a a rapthlak ber a ni.
Thawhlehni khan Odisha Chief Secretary Pradeep Jen chuan thi zat hi mi 288 an ni leh tawh tih a sawi a, a hmaa 275 an tih atangin a pung a, ruang 83 chu tute nge an nih hriat an la ni lo tih a sawi bawk.
Chetsualna hi mihring phur rel pakhat zawkin a kawng zawh lai atanga pengin bungraw phur rel lo ding chu a su a. A hnung lam pindan thenkhat let chu a bul chiaha rel kawng dangah let lutin he kawng zawha anmahni tawk zawnga tlan relin a su zui ta a ni.
Mihring phur rel pahnihah hian mi 3,000 chuang an chuang tura ngaih a ni a, thenkhat chuan an khat tha hle niin an sawi bawk.
Odisha leh state dang atangin an chhungte ngaihvenin damdawi inah mi an kal nasa hle a. An chhungte hmu tawh nia insawite zingah pawh an ni ngei tih finfiah chu thil hautak tak a ni lehzel bawk.
Balasore District Hospital, Odisha-ah Muhammad Nizamuddin chuan a tute pahnih ruang chu finfiah theih a ni lo tih a sawi.
Kum 16 mi, Tafsir Ansari leh kum 13 mi, Tausif te hi Coromandel Express-ah a pa hova chuangin tawhsual hi an tawk a ni.
An pa ber hi a chin an la hre lo va, a fate pahnih thlalak leh mi dang eng emaw zat thlalak chu damdawi inah projector lian tak hmanga tar lan a ni a. Tafsir-a hi tagged number 20 leh Tausif-a chu 169 pek niin hei hi an chhungten an hriata an finfiah tura tih nan a ni.
Rawlthar pahnihte hi an hmaiah hliam an tawrh nasat avangin an hmel atang ringawt chuan hriat an harsa hle a, hei vang hian an pu pawh hian a finfiah mai ngam lo.
An state khawpui, Bhubaneshwar-ah chuan ruang 100 dawn damdawi in pali-ah dah niin finfiah tura tih an ni hlawm a, hetah hian Nizamuddin-a pawh a kal.
Hetah hian Tafsir-a zawng chu chhungkaw dangin an chhungkuaa mi angin an lo chhal tawh a; mahse, a ruang erawh an la hlan lo tih thuneituten an hrilh.
“Engtin nge hetiang a nih theih? Ka tute hi ka hre lo dawn em ni?” tiin hrilhhai takin Nizamuddin-a hian a sawi nghe nghe.
Bhubaneshwar-ah hian thuneitute nen an indawr zui a la ngai dawn a, lehkha pawimawh leh an chhungkuain an tute an lo chhinchhiah dante pawh phawrh a ngai dawn a ni.
“Thlalak atang ringawta zawn dawn chuan ruang tam tak hi an hmel hmuh tlak loh an ni a. Thenkhat chu an hek hem huam tawh a, an tawih deuh tawh bawk,” tiin Bhubaneshwar Municipal Corporation Commissioner Vijay Amruta Kulange chuan thil finfiah a harzia a sawi.
Ruang thenkhat chu chhungkaw khat aia tamin an chuh a, DNA endik niin tute chhung zawk nge an nih finfiah a ni hlawm a, “Ruang finfiah lohte hi damdawi ina ruang dahnaah dah an ni a, ni 10 kawl a la ni ang,” a ti a. Sorkar chu ruangte tihral lamah a hmanhmawh dawn lo niin a sawi bawk.