Bundesliga champion Bayern Munich chuan midfielder Konrad Laimer chu free transfer in an lalut fel.
Austrian midfielder hian RB Leipzig-ah contract a hman zawh hnuah club a chhuahsan a. Leipzig-ah hian kum ruk khelin German Cup vawi hnih a chawi hman a. Bayern Munich-ah hian kum 2027 thleng contract a ziak.
Kum 26 mi Laimer chuan, “Ka tan chuan duhthusam a tak ram chang ang a ni. Bayern hi khawvela club lian ber zing ami an ni a, he club leh an fans te tan hian ka theihtawp ka chhuah ang. FC Bayern hian keimah ang thovin hlawhtlin tumna sang tak a nei a, hei vang hian ka awmna tur takah ka awm dawn a ni.” tiin a sawi.
Laimer hi Bayern Munich in chief executive Oliver Kahn leh sporting director Hasan Salihamidzic te an ban hnua player an lakluh hmasak ber a ni a, nimahsela anni pahnih chhuah hma hian Laimer lakluhna tur hi tihfel a ni vek tawh.
Central midfield leh defensive midfield a mamawh dan anga chhawr theih Laimer hian Leipzig tan match 190 a khel hman a. Hetih chhung hian goal 15 khungin midang khung tur 19 a siamsak bawk.
Bayern a zawm avang hian a hnampui Marcel Sabitzer chu tun nipuiah a chhuah ngheh hmel ta hle.