North America-a mihring maktaduai tel chu Canada ram kang khu tak avanga boruak chhe tak hnuaiah an awm mek a, khaw awm danin a zir loh avang hian thlawhna zin pawh a buai phah.
US-a National Weather Service chuan Ningani khan boruak him loh chu khawchhak vautam atanga zâm tanin New England leh South Carolina thleng a tuam a. Midwest an tih hmun thenkhat – Ohio, Indiana leh Michigan pawh a thleng niin an sawi bawk.
Damdawi in thuneitute chuan US-a state 12 chuangah mi chengte chu pawn lamah boruak him lo tak a tam avanga fimkhur turin an chah.
Canada-ah hian ram kan duh hun laia ram a kan nasat ber tum an tawng mek a, mi thiamte chuan May atang khan an province leh territory zawng zawngah ram a kang tawh niin an sawi.
Tun thleng hian hmun 400 chuangah la kangin a tam ber chu khawchhak lam province, Quebec-ah niin hmun 150 velah Ningani zing lam thleng khan a la kang a, mi 13,500 chuang hmun himah sawn an ni tawh.
Hetih lai hian Quebec Premier Francois Legault chuan chawhnua thuthar lakhawmtute a kawmnaah an dinhmun chu a tha tih a sawi a, thi leh hliam na an la awm lo niin a sawi.
Hmun hima lak chhuahte hi an ina haw leh tur chuan ni nghah deuh hlek a la ngai dawn tih a sawi bawk.
“Ram kang mek a dinhmun dik tak sawi a harsa a, vawiin thleng hi chuan thi emaw, hliam tuar na emaw kan la hre lo va. A pawimawh ber chu uluk leh fimkhur taka chet a ni,” tiin Legault hian Quebec City-a thuthar lakhawmtute a hrilh.
Ram kang hian Canada leh US-a khawpui lian tam tak chu a tisen phût hlawm a, heng zingah hian New York City pawh telin kar tir atang tawh khan in sang tak takte chu meikhu leh chhum zingin a khuh vek.
Ningani khan New York City-a boruak chu khawvel hmun dang khawpuite aiin a bawlhhlawh zawk a, Air Quality Index (AQI)-ah 178 lai a kai.
AQI tehnaah hian a tibawlhhlawh zualtu chu kangmei kaihhnawih vang a ni a, 100 chin chung lam hi ‘hrisel lo’ tih a ni a, 300 chin chung chu ‘hlauhawm’ a ni.
Ningani tukah khan Washington, DC hmun tam tak chu 300 chung lam a ni a, tual chhung thuneitute chuan inralrinna ‘Code Purple’ pe chhuakin ram kang kaihhnawihah avang hian ‘boruak chu a hrisel lo tak zet’ niin an sawi.
“Canada-a ram kang avang hian Washington, DC leh US hmarchhak boruak a him lo hle a, Zirtawpniah pawh a la nih zel a rinawm,” tiin Mayor Muriel Bowser chuan Twitter-ah a tar lang.