Congress sorkara minister lo ni tawh, an hruaitute zinga mi, Aizawl South III MLA hlui, KS Thanga’n nimin khan MPCC President Lalsawta hnenah Congress party atanga a bânna a theh lut.
KS Thanga’n bânna lehkha a theh luhah hian Congress party atanga a bân chhan hrang hrang point 7 a ziak a, Congress President Sawta chu president kal chhuak ta, Lal Thanhawla bânna tura nasa taka hma laah te, Hawla’n mawi hnai taka chawlh a tumna nghak hman loa a bânna tura singnature campaign huaihawtah te a puh.
Congress party thuneitu sang, Political Affairs Committee (PAC) chu rap betah te, Mizo ‘culture’ leh Congress ‘culture’ nasa taka tichhiaah te, party-a a hruaitupuite aia tha bika inlantir tumah te, Congress dante palzama a duh dan anga rorelah te a puh a, hengte avang hian a kaihhruaina hnuaiah awm reng thei a ni tawh loh avangin Congress party chu a chhuahsan ta tih a ziak a ni.
A lehkha theh luhah hian KS Thanga chuan Sawta’n Rs. nuai 25 a dawn ngei thu a ziak lang a, “Luangmual ka in atangin sorkar motor-in i PSO leh driver rawn hruaiin nangmah ngeiin i rawn la thlap a, i hawn ta a ni,” a ti a, a inah pawisa chu a hriat lohin tumahin an dah lo a, a hnuah ngaihthat lohna a neih vang nge, pawisa chu a pe kir tih leh tih sawiin, he pawisa kir chungchanga mi dang hmai tibal zawnga a tawng chhuak leh si chu puitling lo a tih thute a tar lang.
KS Thanga chuan Sawta chu NLUP duh lotu nia insawi sia Rs nuai 2 sem tiam leh siah a puh bawk a, hetia Rs nuai 2 pek a tiam leh site hian ‘principle’ mumal tak neia party a kaihhruai lohzia chiang takin a tilang tih a lehkhaah hian a tar lang bawk.
Congress party-a bânna a theh luh chungchangah hian The Zozam Times chuan KS Thanga hi a bepawp a, party dangah luh a tum leh tum loh chungchang zawhna chu a chhan theih rih loh thu a sawi a, a bân chhan zingah Aizawl South II-a Congress party hruaitute Lalsawta laka an lungawi lohna chu a tel thu sawiin, a bial ni thina an party hruaitute chuan an duhsak hle tih te, politics-a a hma lam hun zel turah pawh an ni thuthlukna ang chu a zui tur a nih thu a sawi bawk a ni.