Aizawl: MNF Lawngtlai Western North & South Block chuan nimin khan Diltlang-ah joint conference a hmang a, a hmanpuitu, MNF Adviser Dr R Lalthangliana’n Mizoram district 11 awma district pariat chu MNF kut chhuak a nih thu a sawi.
Dr Thangte chuan Mizoram hian district pathum rei tak a nei a, district panga chu Congress-in a thuin an sorkar tawp tepah an puang a, engmah an ti hman lo tih a sawi a, 1998-ah MNF an sorkar khan chung district-te chu a takin an tihlawhtling tih a sawi.
Sawi chhunzawm zelin MNF sorkarin 2008-a Hnahthial, Kawzawl leh Saitual te district-a an puan chu Congress sorkarah kutthlak a awm lo a, tun term-a sorkar an chan leh hnu thla riatah an tihlawhtling leh vek tih a sawi bawk a, Mizorama district 11 awma district pariat chu an party kaihhruai kut chhuak a nih thu a sawi.
MNF adviser chuan MNF kaihhruai sorkarin Covid-19 leng karah hmasawnna hna thawh tawh leh thawh mek tam tak a nei a, hri leng bakah ram buai avangin raltlan mi thahnem tak Mizoramin a mikhual bawk a, chutiangah karah chuan sorkar erawh a mualpho lo a, tha takin an hmachhawn zel thei tih a sawi a, chungte avang chuan an party-in sorkarna an siam leh ngei a tul tih a sawi a ni.