Nimin (June 9) kha Deputy Chief Minister hlui, November ni 3, 2022-a chatuan ram pan ta Lalhmingthanga pian champha a ni a, a tu leh fa ten a pualin Aijal Club-ah ‘Lalhmingthanga Night’ an buatsaih.
‘Lalhmingthanga Night’ ah hian Rev. TC Laltlawmlova’n hunserh hmangin, political party hrang hrang hruaitute leh sorkar officer pension tawh te bakah kohhran lama a rawngbawlpui thin ten Lalhmingthanga an hmuh dan an sawina ”Pu Hminga ka hmuh dan’ tih video thlirin an ngaithlahova. A fanu Meriam L. Hrangchal-in kalkhawmte lawmna thu a sawi bawk.
Thu leh hla lama Lalhmingthanga kutchhuakte (Mizo & English) ngaithlaa sawiho niin, a hla phuah ‘Kar a hla’ tih chu Zosangliani’n a sa a, ‘Vanapa Run’ tih chu Zohmangaihi (Seni Vangchhia)-in a sa thung.
H. Lalhmangaihsangi’n Lalhmingthanga sap hla lehlin ‘Lal Isua Hnenah’ tih hla a sak hnu ah Lalhmingthanga nupui Rothuami’n lawmthu sawia hun kharin, kalkhawm ten zanriah an kilho nghal.
June ni 9, 1940-a Vanhne khuaa piang Lalhmingthanga hi MLA atan vawi 6 thlan tlin a ni a. Dy. Chief Miister leh Minister te ni thinin, department pawimawh tak tak a enkawl thin a ni.