Lancet-a zirchianna thar tar lanah India-a cheng mi maktaduai 101 zet, mi cheng zinga 11.4% chuan zunthlum an nei.
Health ministry hnuaia zirchianna neihah hian mi maktaduai 136 (15.3%) zet chu zunthlum intan (pre-diabetes) an ni bawk.
Zirchianna hi The Lancet Diabetes & Endocrinology-ah tar lan niin India rama state zawng zawng huapa inkaichhawn theih loh natnain rama bu a khuar dan hai lan tumna a ni.
Zirchiangtute chuan a hmaa an lo rin lwak aiin India rama cheng zingah zunthlum nei an tam daih tih an sawi a. WHO chuan Indian maktaduai 77 velin zunthlun hi an nei a, maktaduai 25 dawnin pre-diabetics an nei bawk a, hengho hi nei tura dinhmun derthawng tihna an ni.
“Time bomb puah hnai mek dinhmun ang a ni,” tiin zirchianna an hotu, Dr Mohan’s Diabetes Specialities Centre-a managing director ni bawk, Dr RM Anjana chuan The Indian Express chanchinbu hnenah a sawi.
“Pre-diabetes nei tan chuan zunthlum tak tak neih chu kan ram mipuiah an tam chak hle a. Pre-diabetes nei 60% chuang hi kum nga lo awm leh turah chuan zunthlum pangngai nei an ni ang,” a ti.
Madras Diabetes Research Foundation-in Indian Council of Medical Research (ICMR) puihnaa zirchianna a kalpui hi kum 10 zet neih niin India-a state tin atangin kum 20 chin chung lam mi 1,13,000 chuang an tel.
Kum 2008-a data lak khawm, kum 2021-a National Family Health Survey tihchhuah hnuhnung ber rinchhan chu hman niin hei hi sorkarin a ram mite hriselna dinhmun tehna atana a hman a ni a, in tina luta survey a neih behchhan a ni.
Zunthlum nei tamna ber chu Goa niin mi cheng zinga 26.4% zetin an nei a, Puducherry (26.3%) leh Kerala (25.5%) ten an dawt.
Zirchiannaah hian Uttar Pradesh, Madhya Pradesh leh Bihar-ah zunthlum nei an pung chak a, Arunachal Pradesh chu pun chak lohna leh an tlemna a ni thung.
Zunthlum hi khawpuia chengte aiin thingtlanga chengte zingah a tam zawk tih zirchiannaah hian hmuh a ni bawk.
Khawvel pumah zunthlum hian puitling 11 zela pakhat aia tam mah a tibuai a. A natna hian heart attack, stroke, mitdelna, kal chhia leh taksa peng tan ngai thlengin a nghawng thei.
A tlangpuiin chi hnih, type 1 leh type 2-ah then a ni.
Type 1 zunthlum hi hriatna thazam natna a ni a. Hei hian mihring taksaa insulin siamtu (beta-cell) beiin thisena sugal level thununtu hormone mamawh khawp a siam theih loh phah thin.
Type 2 zunthlum hi mihring nunphung dik loh vanga thleng a ni tlangpui a, taksa enkawl uluk loh vanga thau lutukte hian insulin hnathawh tur ang thawhtir thei lovin a siam thin.