Israeli sorkar kal chhuak mai tawh tur chuan sakhaw la run pawlten kawng an zawh tur, buaina lian zawk chhuah palh hlauh vanga a huaihuattute pawhin an thulh tawh chu kaltlangpui turin an ti.
Flag march hi Jerusalem-a Muslim Quarter thlenga neih tur a ni a, Ningania neih tura tih hi a ni a; mahse, police-ten buaina chhuah hlauh vangin a kawng an thlak.
Thawhlehniah hian kawng zawh hi neih a ni dawn ta zawk a ni.
Gaza thununtu, Islamist movement Hamas chuan kawng hi zawh a nih chuan Israel nena an inkarah buaina dang a chhuak dawn tiin an vau lawk.
Thla hmasaa ni 11 chhung an indonaah khan Gaza-ah mi 242 vel an thi a, Israel-ah mi 13 an thi hman bawk.
Israeli Prime Minister Benjamin Netanyahu-a kaihhruaia Thawhlehnia cabinet thukhawm chuan kawng hi zawh ngei turin thutlukna a siam.
Israeli parliament, Knesset-ah hian Pathianni hian Netanyahu-a sorkar hi buk a ni dawn a. Prime minister ni rei ber tawh hi tun hnaia tangrual thar insiam chuan paih thlak theih an inbeisei.
Sorkar hi a tla ta a nih chuan ultra-nationalist Naftali Bennett leh centrist Yair Lapid-a kaihhruai sorkar a ding dawn a, ni hnih hnua flag march neih tur leh tur loh thutlukna an siam zui a ngai ang.
Palestinian-ten he kawng zawh hi an haw em em zel a. Kuminah hian Islam thla thianghlim, Ramadan tawp lam nen innangin Israel leh Gaza inkara indona chhuak zui nen, boruak a chiriin tun tum kawng zawh tura sorkarin thutlukna a siam pawh hian ngaihven a hlawh nghal hle a ni.