Kum li hnuah Chhinga Veng Spikers-in hnehna kawng an zawh thar leh a, Ningani Tata SK Pro Volleyball League-ah 3-1-in Tuipuiral an hneh.
R Dengthuama Indoor Stadium, Mualpuiah Chhinga Vengin Tuipuiral lakah team tha zawk an nihna chiang takin an lantir a, 25-16, 22-25, 25-20, 25-19-in an chak.
2019 final-ah Durtlang North hnehin a vawi khat nan Chhinga Veng an champion a. Covid-19 leng vanga kum hnih awl a nih hnuah nikum khan Pro Volleyball chhunzawmin, league tum li an khelh champion lai Spikers an tlawm vek.
Season kal mekah 2022-a Durtlang North champion team player pawimawh Lalbiakmuana an la lut a, tun tournament atan Rajasthan player tha Javed Khan la lut bawkin champion leh tumin team thar an din.
Nikuma mang chhe tak an neih vai kiang nghalin tha takin league bul an tan a, 2019 hnua Pro Volleyball-a an chak hmasak berah Biakmuana’n point 18 hmuin tum nga chiah a tisual a, fel fai takin a khel.
Spikers tan a inlan hmasak berah Javed chuan point 22 hlawh mah se 12 a paih a, K Lalfakawma’n awmze neiin a khel a, vawi 14 vaw tlain tum nga a tisual.
Kaithar Tuipuiralin Pro Volleyball khel thei mahse inkhel boruak leh kawng hrang hrangah an la mikhual a; chutih laiin set khatna an hloh hnuah Delhi atanga an lak luh Anurag Rawat chuan team tan beiseina a siamsak.
Mahse Mizo player khaikhinin tawnhriat leh theihna hrang hrangah Chhinga Veng an khan lo va. Set khat ve ve an lak hnuah Tuipuiralin harsatna tawk zuiin Anurag a mal tan nasa a, lehlam an bei let zo tawh lo.
Mizoram a a inkhelh vawi khatnaah team a chakpui lo na a, mittlung takin Anurag a inlar a, point 35 hmuin 20 a hloh a, D3 Business Player of the Match lawmman a dawng.
Kar leh Thawhlehni zanah Chhinga Vengin khelh hnih chak zawn tumin Durtlang North an hmachhawn dawn a, a tuk zanah Tuipuiralin insiam that mamawh chungin Mizo hlang TNT an khelhpui ve leh ang.
Dan theih loh Hunthar
2017 leh 2018 champion Huntharin lungthu kim tumin tha takin bul an tan a, Tata SK 712 Pro Volleyball League an khelh hmasak berah 3-1-in Tuichangral an hneh.
Ningani zanah hmuhnawm takin R Dengthuama Indoor Stadium, Mualpuiah an inkhel a, 25-20, 21-25, 25-23, 25-20-in insawrbing rei thei leh inthunna nei tha zawk Hunthar an chak.
Mizoram volleyball-a inelna sang leh inbeihna nasaah Punjab spiker Gagandeep Singh chuan Hunthar a tanpui a, point 25 vaw chhuakin point 10 a hloh a, a hnung atanga a hlap thlak hmangin set khatna an la.
Vinod Khatkar leh Khawhai tlangval Saidingpuia Sailo chuan Tuipuiral an nawr kal ve thung. 23-20-a sang zawk an nih hnuah Vinod chuan vaw tla zawnin set hnihna an la a, Haryana spiker hian a pum puiah point 28 hmuin 12 a hloh a, D3 Business Player of the Match-a thlan a ni.
Set khat ve ve an lak hnuah mipui thawm a thain inkhel boruak a sosang hle a. Hunthar setter Remsangzuala’n awmze neiin ball a sem a, Lalruatfela Sailo chuan fing taka a khelh bakah Laldensanga, Zomuansanga leh Lalramnunfela’n team an tanpui tel a, set thumna leh lina tir lamah 11-6 leh 7-2-in hma an hruai.
Set tir lam leh a tawp lamah Tuichangral an chiai thin avangin tawn hriat nei Hunthar an hriam a, set hnih la zawnin team el tham tak lakah fiahna an pal tlang rualin rin hlawh an nihna an chhawm nung thei.
2019 leh 2022-ah final lut pha lovin semifinal-ah Hunthar an tla zawn a, tun season-ah team hlauhawm siam thar lehin Pro Division inelna vawi hnih awm tawhah an champion ve ve.
Season kharna leh Mizoram inelna sang berah lungthu kim theihna chi hnihin a hmuak mek a, an hlawhtling a nih chuan trophy pathum nen kum kharin a tum thum nan Pro Volleyball-ah an champion bawk ang.
Tun season-a hneh theih loh Huntharin inrinniah an khel leh nghal dawn a, champion lai Durtlang North nen an inhmachhawn ang.