A tawp a tawpah chuan India–in Miss World 2023 a thleng dawn ta a, 1996 kuma Mumbai-a nghah a nih hnu-ah ‘comeback’ nghahhlelhawm tak a ni ang.
Nimin piah khan New Delhi-ah Miss Organisation chuan an hotunu Ms Julia Morley awm laiin, India ramin 71th Edition a thlen tur thu hi a puang a, hetah hian Miss World 2022 Karolina Bielawska pawhin a tawiawm ve bawk.
Miss World Organization Chairperson leh CEO Ms Julia chuan, “India-in 71st Miss World Final a thlen tur thu puan hi a nuam hle mai. Kum 30 hmalam daih tawh khan he ram mawi leh duhawm tak ka tlawh tawh a, ka ngainatna a zualin, min hneh hle a ni.
“Culture hrang hrang phochhuahna, hipna changkang leh mit la ta tak tak nena inlan hun hi kan nghakhleltlang hle tawh a ni,” a ti.
Kum tam liam ta khan Indian nula chhuanvawr Rita Faria, Aishwarya Rai Bachchan, Priyanka Chopra leh Yukta Mukhey te chu Miss World atan puan an lo ni tawh hlawm.
Miss World hian hmeichhe hmeltha leh duhawm mai ni lo, taksa pianmawina bakah thluak leh ngaihtuahna tha tak tak nei nula chhuanawm tak tak a lo vawrhchhuak tawh thin a. Hmeichhiate’n zalen taka an chhungril an phawrhchhuah theih nan te, ‘aw’ an chhuah theihnan te bakah a tha zawnga khawvel tana an thawh theihna tur te bakah danglamna duhawm tak thlen theihna tur atana an dinhmun chawikan hi a thil tum langsar tak a ni nghe nghe.
Khawvelpumpuiah Miss World Organisation hi heti ang lam thlanna bikah chuan upa ber a ni a, 1951 atang tawh khan kalpui a ni.