Larsap Dr. Hari Babu Kambhampati chuan nimin khan Raj Bhavan-ah P&E department hotute leh Central Water Commission hotute a kawm a, Mizorama lui luang atanga kawlphetha siam chhuah theih zat dik tak zirchian dan tur an sawi ho.
Thutkhawm kaihruaitu, larsap chuan Mizorama kawlphetha siam chhuah chungchangah prime minister a hmuh tawh thu te, hun remchang hmasaah Mizoram sorkara P&E department-te’n Prime Minister’s Office (PMO)-ah presentation an pek a lo remtihsak thu a sawi.
Larsap chuan Mizoram sorkarin PMO-a presentation an pek hmain kawlphetha a tharchhuah theih zat chiang zawka zirchian a ngai a, survey & investigation chu CWC leh P&E ten an neih tawh angin statistics neih a ngai nia a hriat thu a sawi a. Statistics inang khat leh rintlak a rang lama neih a nih theih nan CWC leh P&E te chu information an neih angte inpe tawna thawk ho turin a chah a ni.
He hunah hian CWC team lamin an thil zirchianna neihna atanga an thil hmuh chhuahte an tar lang a, P&E department hotute pawhin hman an lo lak tawh dante larsap hi an hrilh a, hemi hnuah CWC leh P&E te thawhho dan tur leh hmalak zel dan tur te an sawi ho bawk a ni.