French President Emmanuel Macron chu an ram chhimchhak lam a tlawhnaa mipui zingah a inlan laiin a hmaiah ben a ni.
Social media-a video thehdarhah chuan Macron-a hi Valence khawpui dai, Tain-l’Hermitage-a amah lo hmuaktu mipuite daidanna hrula a kal laiin ben a ni.
T-shirt hring ha mi pakhatin a beng a, rang takin officer-te an inrawlh nghal a, president pawh hruai hran nghal a ni.
French chanchinbute chuan he thil thlengah hian mi pahnih man an nih thu an tar lang.
President Macron chuan, “Vantlanga sawi awm turin tharum thawh duh mite hi an inlan tur a ni lo, an phu lo,” tiin French chanchinbu, Le Dauphiné hnenah a sawi.
Amah bengtu hian ‘Down with Macron-ism’ tia au pahin president hi a beng a, ‘Montjoie, Saint-Denis’ a ti bawk a. Hei hi King Charlemagne-a hun laia Kingdom of France indo au hla pakhat a ni.
Video-ah hian Macron-a hi mipuite dalna bulah hian a let leh thuai a, amah lo hmuahtute pawh a be chhunzawm leh nghal.
“Ka ti zel a, ka ti zel bawk ang,” a ti a, “Engmahin mi dang dawn lo,” a ti.
Bengtu hi tunge a nih leh engvanga hetianga che nge a nih hriat a ni lo va. Amah leh mi pakhat chu thuneituten thil an zawt chiang mek.