Synod Bookroom chuan an lo tih thin angin nimin khan Synod Office Committee Room No 2-ah Synod Bookroom Distributor’s Meet an hmang a, kum kal ta khan bookroom-in Rs vaibelchhe 20 chhuang a thawk chhuak tih tar lan a ni.
Conference hi Stock Supervisor Vanlaltirha’n a hawng a, Synod Bookroom Manager Lalniliana’n bookroom distributor bikte sum dinhmun report pein, report atanga a lan danin kum kalta khan Synod Bookroom chuan a pum puia an budget, Rs 14,40,00,000 a ni a, an sum thawh chhuah chu Rs 21,97,27,814 a ni a; budget an khumna hi Rs 7,57,27,814 a ni.
Lalniliana chuan nikum khan Synod Bookroom din tan atanga sale tam ber kum a nih thu a sawi a. Synod Bookroom hnuaia distribution center 48 bikten an budget, Rs 1,78,00,000 chu tha taka khumin Rs 3,11,83,720 an thawh chhuah thu a sawi bawk.
Chawhnu lamah Upa H. Ronghaka, General Manager chuan meet kaihruaiin Mizoram puma distributor hrang hrangte atangin report leh rawtnate ngaihthlak a ni.
Kum kaltaa Synod Bookroom Distributor tha thlanna result puan niin. Pakhatna – Synod Bookroom Sairang Distributor; Pahnihna – Synod Bookroom Zamuang Distributor; Pathumna – Synod Bookroom Darlawn Distributor te an ni.
Tun dinhmunah Synod Bookroom hian distribution centre 48 a nei mek a ni.