Paris khawpuiah Polish nula a huangtau tluang zel a, French Open thunun chhunzawm zelin kum li chhunga a tum thum nan Iga Swiatek a champion.
Roland Garros a hmeichhe singles final-ah Inrinni zan khan Swiatek hian Karolina Muchova lakah 6-2 5-7 6-4 in hnehna a chang a. Seeded number one hauhtu Swiatek hi champion tura rinkai zawk chiang takin nimahsela world number 43 nilai a khingpui lakah hian theihtawp a chhuah a ngai ve tho.
Kum 26 mi Czech player Muchova hian set hnihna a lak mai bakah set thumnaah 4-3 a hma hruai turin Swiatek service hi a break sak hman a. Nimahsela kum 22 mi Swiatek hian a tawp khar tha zawkin nghet takin hnehna chang turin a khel tluan.
Swiatek hian Grand Slam title pali a lakna niin kum 2007 a Justine Henin hnua Roland Garros a champion trophy humhim thei hmasa ber a ni bawk.
Coupe Suzanne Lenglen a inkhel a zawhah Swiatek hian, “Inkhel awlsam a ni lo. Tunkar hrim hrimah inkhel harsa tak tak ka hmachhawn. Hei vang hian ka champion leh thei hi ka lawm. Record hi ka en ngai lem lo, nitin theihtawp chhuah hi ka tum ber a ni.” tiin a sawi.
Swiatek clay court tournament vawi 16 a tel tawh atangin vawi sarih a champion na a ni.