Aizawl: Larsap Dr. Hari Babu Kambhampati chuan Inrinni khan tennis court bulhnaia thei leh thlai zuartute a kawm a; an sumdawnna kalpui dante enpuiin hlawk zawka an kalpui theih nan an mamawhte a sawipui.
Larsap hian thei leh thlai zuartute chu sorkar laipuiin an ham thatna tur loan leh scheme hrang hrang a duan leh street vendor te hmasawn nana loan puk theihte chu a hrilhfiah a. Mi harsa ber tan pawha harsa lo tea inziah luh theihna social security scheme hrang hrangte zawm ve theuh turin a fuih a. An thil zir leh hriat tharte chu an thian dangte hrilh chhawng turin a chah bawk.
Thei leh thlai thar zuarte a tlawhnaah hian sumdawngte mamawh thurawn leh bank loan chungchanga hriat tur pawimawhte lo hrilh hre zel turin bank hotute pawh an tel a ni.
Sorkar thuchhuahin a tar lan danin larsap hian bank hotute chu sumdawngte hmakhua ngaia sorkar laipuiin loan chi hrang hrang leh social security schemes a tihchhuah te chu nasa zawka mipui te hnena zirtirna pek a nih theih nan a lo sawi hopui tawh thin a ni.