Tunlaiin Aizawl khawpui tui lakna pui ber, Tlawng chu tihthianghlim harsa khawpin a nu mek a, a nut belh zel chuan tui sem chhuah kawngah harsatna lian tak a thleng thei a. Mizoram hmun danga mipui tui tlan, lui dangte pawh a nu hle a, PHE-in tui an sem tihtawp lailawkna khuate pawh a awm.
The Zozam Times zawhna chhangin Aizawl Water Transmission Division hotute chuan tun laia fur ruahtui tla mekah Tlawngah tui a tam rualin a nu hle a, mipui in atana him tawk tura tihfim kawngah pawh sawngbawl nasat a ngaih thu an sawi a, chutihrualin tun dinhmun erawh tui pump chhuah tur khawp chu an la tifim a, tui pump-ah harsatna a la awm rih lo tih an sawi.
PHE hotute chuan tui hi a nut zel chuan tui pump chhuah tur khawp tihfimte pawh a harsat mai an hlauhthawn thu an sawi bawk a ni.
Reiek kaia Tlawng baka Mizoram hmun danga mipui tui in tur lakna Tlawng pawh tun lai hian a nu hle a, Tuivawl lui pawh a nu nasain, a nut zawng tehna, Nephelometric Turbidity Unit (NTU)-a teha mihring in tlaka ngaih aiin a nu a, hei avang hian tui sem kawngah pawh harsatna a thlen phah mek a ni.
Tlabung mipuite tui tlan ber, Khawthlangtuipui pawh tun hnaia ruahtui tlain nasa taka a tihnut avangin Tlabunga PHE department laboratory-a zirchian a nih hnuah mihring hman atan a thianghlim tawk loa ngaih a ni a, hei vang hian department pawhin mipui hnena sem tur an siak thin chu an titawp lailawk rih a ni.
Chhungkaw tam tak, ruahtui an dawn khamkhawp lote chuan mi mal lirthei hmanga tui chawi chu hman atan man chawia leiin hei hi rinpui berah an hmang mek a, hetiang a nih avang hian tui hralh tur chawi thinte chu an indaih lo lek lek hial thin zawk tih, Tlabung atanga thudawnna chuan sawiin, an lirthei hmanga tuichawi thinte hian a tlangpuiin litre 1,000 chu Rs. 500-in an hralh leh thin tih a sawi a, a chang chuan ni khatah Rs. 7,000 chuangte pawh an lakluh chang a awm thin tih a sawi.
Tlabung khaw chhungah PHE department tui sem ring chhungkaw 650 bawr vel awm mekin, an hnena sem tur tui lakna khâwl hmangin darkar sarih chhungin litre nuai hnih bawr vel siak ngah hman thin a ni a; nimahsela, tuna tui dinhmun chu department laboratory-a endik a nih hnuah, mipui hnena sem tlaka ngaih a nih loh avangin tui siak chawlhsan rih a ni ta a ni.
Hetianga Tlawng a nut viau chhan hi kawng siamna leh hmasawnna hnathawhna danga leivung kawrteah paih a nihin ruahtui a tlak hlekin tui a nu awl em em a, Tlawng hian a tuar ta nia thudawn a ni.