Uruguay chuan an ram chanchin a vawikhatna atan FIFA U-20 World Cup an chawi a. Final-ah 1-0 in Italy an hneh.
La Celeste tia hminglem an vuah thin Uruguay in hnehna an chan avang hian he tournament-ah a zawna European team tum li an champion tawhna chu an titawp.
Argentina a Estadio Único Diego Armando Maradona a final inkhelah hian Luciano Rodriguez chuan minute 86-naah an chakna goal hi a tauh lut a. Inkhel thununtu zawk Uruguay in huntawp dawnah goal khungin hnehna an chang.
Uruguay hi tun tournament chhung zawngin an tlarhnung nghet chu an team chakna a ni thin a. Goal thum chauh chhuahin hengte hi England lakah group stage inkhela an chhuah vek a ni.
Final inkhelah hian goal khung theihna remchang an nei nual a, Rodríguez, captain Fabricio Díaz leh Anderson Duarte chuan goal khung teuh vekin Italy goalkeeper Sebastiano Desplanches chuan save ropui tak a siam a ngai bawk.
Lehlamah tun tournament a top scorer chuan final inkhel bikah beisei a pha lova, an ram tan danglamna a siam thei lo.
Uruguay hi kum 1997 leh 2013 khan he tournament-ah hian final an khel tawh a. Kum 2011 a Brazil an champion hnua South American team champion leh thei hmasa ber an ni.
Final a intawng pahnihte hi tun tournament-ah hian rinkai ni lo mahse team lian zawk tura ngaihten club lamin an player-te an chhuah duh loh avangin player tha chhawr theih loh an ngah.
Mimal chawimawinaah goal sarih khung Chelsea midfielder chuan golden boot a dawng a, player tha ber chawimawina golden ball a dawng bawk.
Uruguay defender Alan Matturro chuan silver ball dawngin goal nga khung Brazil striker ngaihven hlawh Marcos Leonardo chuan silver boot a dawng.