Amazon ramngawa an thlawhna a tlak hnua ni 40 zet vakvai naupang palite chu an tlak hnuah an nuin ni li a la dampui a, kal tura a tih angin an kal ta nia sawi a ni.
Magdalena Mucutuy-i hian a fate pali hi amah kalsana puitu tur zawng turin a ti a, ani hian a thihsan ta a ni.
Naupangte pa, Manuel Ranoque chuan thuthar lakhawmtute hnenah a fanu upa ber hian a nuin kal tur leh an himna ngaihtuah tura a tih thu a hrilh tih a sawi.
Unau palite hi a upa ber kum 13, kua, nga leh khat niin Zirtawpni khan thlawhna hmangin ramngaw atanga lak chhuah an ni.
An khawpui, Bogota-a sipai damdawi inah enkawl mek an la ni.
“Kum 13 mi Lesly-i’n chiang taka min la hrilh chhun chu an nu hian ni li a dampui a ni,” tiin Ranoque chuan damdawi in tuala thuthar lakhawmtute an kawmnaah a sawi.
“A thih hma hian, ‘Kal sawn ula, i pa anga mi tha in tawng ang, ani kha keimah ang bawka in chunga hmangaihna lantirtu a ni,’ tiin a hrilh a ni,” a ti.
Naupang unau lite ni 40 zet ramngawa an vahvaih dan kimchang hi hriat belh zel a ni a, hmuh an nih tirha an lo awm dan pawh hriat theih a ni tawh.
Chhanchhuah hna thawktu, Nicolas Ordonez Gomes chuan, “Kan hmuh hian a upa ber, Lesly-i hian a nau te ber hi pawmin min hmuh chuan kan lam panin a lo tlan a, ‘Ka ril a tam,’ a ti nghal a ni,” tiin RTVC hnenah a sawi.
“Mipa naupang pahnih hi an lo mu a. A kaih thawh chuan pakhat zawk chuan, ‘Ka nu a thi tawh,’ a ti a. Chhanchhuaktute hian tha taka lo chhawnin an chhungte tirh an nih thu an hrilh,” a ti.
Ordonez Gomes-a chuan, “Mipa naupang hian, ‘Chhang leh sausage ka duh,’ a ti leh bawk,” a ti.
Pathianniah khan naupangte hi ramhnuaia chawlhkar eng emaw zat an bo hnua hmuh an niha bawihsawm an nih dan video thenkhat tihchhuah a ni tawh.
Mucutuy-i leh a fate pali hi Cessna 206 thlawhnain Araracuara, Amazonas province atangin May 1 khan San José del Guaviare panin an thlawk a, an thlawhna khawl chiang lo avangin an tla.
Nu leh pilot pahnihte ruang chu an tlaknaah hian sipaiten an hmu nghal a, naupangte hi ramngawah hian an bo zui ta a ni.
A zawn hna thawkin sipai leh tual chhung mite an phu suau suau va. An hnuhma hmuh a nih avangin an dam ngeia ngaih an ni.
An hnampui dangte chuan naupang mah ni se ramngawa chet thiam leh theite pawh ei tur chi hria an nih avangin an dam theih an beisei sa bawk a ni.