Jaish-e-Mohammad (JeM) hel pahnih chu venhimna hnathawktu sipaiten Jammu & Kashmir-a Anantnag district-ah an kap hlum.
Venhimna hna thawktu sipaiten Kandipora-a Bijbehara hmun khara mi zawn beihpui an thlak laiin helhovin silaiin sipaite an kap a, zankhuaa an inbeih hnuah hel pahnihin an thi.
Police thuneitute chuan Nilaini khan helai hmunah hian helpawl an awm tih thu an dawng a, chumi bawhzui chuan an zawng chhunzawm ta a ni.
“Hel zawngtute hian an bihrukna an hnaihchilh hnuah inpe mai turin vawi eng emaw zat an ti hmasa a. Helho chuan duh lovin sipaite chu an kap a. Sipaiten kap let ve nghalin, tlawm tum lo ve vein awmhmun an khuar a. Khua a thim avangin an chawl lailawk a; mahse, sipaite hi an tanhmunah zankhuain an awm a. Khaw var hnuah helte chu vawi eng emaw zat tlawm turin hriattir an ni a, duh lovin an inkah chhunzawm zel a, helpawl mi pahnihin nunna an chân ta a ni,” tiin police thuneituten an sawi.
“An birukna atang hian dan lova an kawl silai leh ralthuam eng emaw zat hmuh chhuah a ni a. Ralthuamte hi chhui zui zel turin case record-ah ziah luh an ni,” tiin an sawi bawk.