Mayon hi Guinness pawhin ‘most conical’ tia a pian hmang mawi avanga a sawi niin a kang pawhin mi a hip a, khualzinten an pan phah.
Tual chhung thuneitute pawhin khualzinten a kang inphuh chhuak lai chiang taka an hmuh theihna turin a thlirna hmun an siam hial bawk.
“Nizan khan Mayon hi a phuhna kua atangin chirh sa a phuh chhuak leh,” tiin disaster response thuneitu, Eugene Escobar chuan Thawhtanni khan TV-a an kawmnaah a sawi.
French khualzin, Philip Balselle chuan ABS-CBN News hnenah Philippines-a chawlh a hman laia Mayon a kang chu vannei a intih thu a sawi a. A bul hnai khua atanga en turin khualzin dangte nen an kal thu a sawi bawk.
“Mayon hi ka vawi khat hmuhna a ni a, a kan lai tak lehnghal a ni,” tiin Filipino khualzin, an khawpui, Manila atanga zin, Joseph Palasigue chuan a sawi a, darkar chanve vel inkhalha a pan thu a sawi.
Mayon mawina hi Filipino folklore pop culture-ah pawh a lar a. A hming hi tual chhung tawnga nula hmeltha sawina, daragang mayon atanga phuah a ni.
Filipina beauty queen, Catriona Gray-i pawh kha 2018 Miss Universe thlannaa gown a hak kha Mayon panga a kang inphurh zam thla behchhana duan a ni a. A nu pawh tlang awmna, Albay province-a piang leh sei lian a ni.