Kan thenawm state Manipur state buaina chu chi leh chi buaina, ram inchuhna a ni ber mai a. Tribal te luahchin tlangram chu Manipur meitei te chuan neih sak tumin buaina an siam a. India danin a humhalh tlat chungin kawng hrang hrang an zawng a. India dan puiin a humhalh tlat tih hre reng chungin tunah phei chuan zohnahthlakte chu foreigner tia puhin tharuma umchhuah vek an duh tih a lang chiang hle. Tih ngei an tum hmel hle bawk.
Hetia umchhuah an tum rual hian an hnungah India ram Hindu firfiak rama siam duh Hindu ho support an dawng tih a lang a. Chi leh chi buaina a ni tih hrereng siin Kristiante biakin chu an han vaihma tel lui tlat a. Biakin 200 aia tam fe an hal lui tlat mai hi hriatthiam a har tak zet mai. An rilruah Kristiante hnawk tihna chu a lian em em a. An chet danin an tilang ta a ni.
Hetia meitei ho chet dan hian India ramah ngaimawh a hlawh nghal a. Kristian denomination hrang hrangte chu lo penchhuakin an duh loh entirna an ti lang a. Khawvel hriat turin an auchhuak mek. An pungkhawm a, kawng te an zawh a. Ram hruaitute hnenah an duh lohna an thlen a. Hetiang karah hian keini kristian ram inti state chu kan ngawi tlat mai a. Khawi kohhran mahin thawm nei lovin ngawih kan chu thup a. Kristian biakin hal a, sawisak chhiat vek a ni tih hi kan ring tak tak lo emaw ni tih mai tur a ni. Nge ni a, biakin halchhiat hi kan lo la na vak lo zawk? Mizoram buai lai khan vai sipaiho khan biakin an zah lohna kha kan haw hle niin an sawi a. Tuna hetia Manipur a kan unaute biakin hal hi kan duh lohzia kan auchhuahpui ve ngei tur a ni ngei ang. Kan duh lohna lantir tur hian political party te nge auchhuak dawna kohhrante hi? Kan ngawih ral mai chuan Kristian state pawh kan inti ngam meuh tawh dawn em ni? Northeast state zinga Meghalaya te pawhin an duh lohna lantirin kawng an zawh tawh. Tunge pen chhuak ve dawn le?