- Ruata
Maruti Suzuki crossover lirthei thar Fronx chuan beisei lawk ang ngeiin duhtu a ngah a. Thla hmasa chhung ringawt khan 9683 lai an hralhchhuak a, an hralh zat hi la pung chho zel tura beisei a ni.
Maruti Suzuki-in market-a an lirthei hralhchhuah hrim hrim hi a pung tha hle a, hei hi chhan tam tak awm mahse India rama SUV demand sang chho zel chu a chhan lian ber te zinga mi a tih theih a. Maruti Suzuki-in May thla chhunga car leh SUV an hralh zat hi 143,708 a tling a. Hetah hian an SUV leh crossover SUV Grand Vitara, Brezza leh Fronx te hi 33,000 a tling a ni.
Tunhnai maia tlangzarh Fronx hian duhtu a ngah hle a, tarlan tawh angin Maruti Suzuki hian 9,683 an hralh a ni a. Baleno platform hmanga duan Fronx hian Baleno sales a rawn ti chhe mai ang a tih a hlauhthawnawm viau laiin a ti chhe hran lo niin a lang a. Baleno design duh chuan an duh ngaiin an duh reng a, Baleno pawh an hralh tha viau tho a, Fronx hian a rawn vawchhe hran lo a, a hrang ve vein hralh a kal dun viau a ni. Baleno hi May thla chhunga car hralh tam zual 10 zinga a lang a, May thla khan 18,733 lai an hralh a. Nikum May thla nena khaikhinin thla hmasaa an hralh zat punna hi zaa 34.09 a ni.
May thlaah khan SUV zingah Hyundai Creta chu hralhchhuah hnem ber niin 14,449 hralhchhuah a ni a. Pahnihnaah Tata Nexon a awm thung a, 14,423 hralh a ni a, Maruti Suzuki Brezza chu pathumna niin 13,398 hralhchhuah a ni. Tata Punch leh Hyundai Venue hian a indawt dan hian palina leh pangana an hauh a, Fronx hian May thlaah hian Kia Sonet rawn kal pelin 6-na dinhmun a rawn hauh thung a ni.
Maruti Suzuki Fronx-ah hian khawl chi hnih duhthlan tur awmin hengte hi 1.0-litre 3-cylinder Boosterjet petrol leh 1.2-litre K-Series petrol te a ni a. A hmasa zawk hian 100bhp power leh 147.6Nm torque a pechhuak thei a, a hnuhnung zawka mi hian 90bhp power leh 113Nm torque a pechhuak thei thung a ni. Transmission lamah chua 5-speed manual leh AMT 1.2L khawlah leh 6-speed torque converter automatic 1.0L turbo petrol-ah te duhthlan tur a awm a. A tui heh zawng lamah chuan 1.2L petrol hian ARAI certified mileage 21.79kmpl (Manual Transmission) leh 22.98kmpl (Automatic Transmission) te a nei a. 1.0L manual leh automatic 21.5kmpl leh 20.01kmpl te a nei thung a. Lirthei tui heh lo tak, chak tha bawk si a ni tih hei hian a tilang awm e.
Maruti Suzuki hian an lirthei huang la tihchhuah ngai loh crossover te lamah Fronx hi an rawn tichhuak a ni a. India ram mipuite pawhin an duh chho dawn viau niin a lang a, Baleno nghahchhana duan, Baleno nena inlenhleih lutuk si lo, lirthei mawi leh langsar tak hi market lamah eng nge a an chhoh zel dawn tih hi zawhna pawimawh leh a chhanna hriat chakawm tak zawhna a ni awm e.