Clean Lunglei-in nimin khan an kum 10 tlin an lawm a. Minister C. Lalrinsanga’n telpuiin, Clean Lunglei te chawl lova kum 10 an kal thei chu a lawmpui thu a sawi a, faina leh bawlhhlawh sawngbawl kawngah Lunglei mipuite an thangharh hle tawh avanga lawmawm a tih thu a sawi bawk.
C Lalrinsanga chuan Clean Lunglei dintu zing ami MLA hlui Joseph Lalhimpuia leh a thawhpuite hmalaknaah lawmthu a sawi a. Clean Lunglei hian theihtawp chhuahin an bei a, institution hrang hrangah te, dawr leh kawtthler ah te faina lama kan mawhphurhna theuh hlenchhuak turin an tlangaupui thin a. Bawlhhlawh awm tirtu chu mihringte kan ni a, a awmlohna hmun a a awm vangin bawlhhlawh a ni, tiin, plastic leh sarang te hian lui leh lui dunga nungcha te thlengin a nghawng a ni, a ti.
Faina leh thianghlimna hi zirlai naupangte atanga zirtir an ngai, tiin, bawlhhlawh paih kawngah thangharh lo mi tam tak an la awm chu pawi a tih thu a sawi a. Bawlhhlawh paih kawngah midangte zirtirna pek a ngaih thu a sawi bawk.
Tuna kan kal chin chinah chuan hmasawn tawh tak kan ni tiin, kan tawngkam hmanah te pawh fimkhur ila, he thianghlimna hian huam tel sela. Tawngkam tha leh mawi kan chin than a ngai a ni, a ti bawk.
Clean Lunglei hi July 12, 2013 a din niin, kawng tam takah hma an la a, Sanitation Volunteer din te, Khawpui tihfai hnatlang, hmun bik tihfai hnatlang, bawlhhlawm bawm sem leh bawlhhlawh halna siam, awareness campaign school leh college, cable TV leh talkshow te neiin khawpui hmun hrang hrangah signboard hoarding te tarin, Zotlang leh Ramthar khamah Wirefencing te an dah bawk a ni.
Clean Lunglei kum 10 tlin lawmna pual hian Essay, Slogan, Mobile Photography Competition buatsaih a ni bawk.