Aizawl : MNF Publicity Board member, Mizoram University-a Associate Professor ni bawk Dr. Irene Lalruatkimi’n “MNF sorkar hnuaiah hmasawnna tamtak kan hmu” tiin, MNF nih chu Mizoram mai ni lo, ram dangah pawh a nuam zel niin a sawi.
Nimina MNF party chhung inkhawmah he thu hi Irene Lalruatkimi chuan a sawi a. “Sum leh paiah direct-in sorkar chhawr lo mah ila, kawngpui tha min pek te, buhfai leh gas hnianghnara min pek te avang ringawt pawh hian sorkar chu kan chhawr a. Mipui tana phurrit tham chhiah la si lova, kan sorkarin min tihsak zozai en hian sorkar chungah lawm nachang kan hriat a hun hle a ni,” a ti.
Mizoram University pawh India leh MNF inremna avanga neih a nih thu sawiin, Sawiselna tamtak karah huaisen takin MNF sorkarin Central University ni tura a din a nih thu a sawi a. Indian Institutional Frame work (IIRF) ranking ah 13 na a nih mek tuh leh North East-a University tha bera chhal ngam a nih hial thu sawiin, “Thalaite khawvel tha zawk leh hmasawnna thlentu MZU tih kan lam rualin thinlungah MNF a lang tel lo theilo, a ti” bawk.