Union Public Service Commission (UPSC) chuan Civil Service Preliminary Examination 2023 a buatsaih result chu nimin khan a tichhuak a, Mizoram mi paltlang mi 11 an awm a, an zinga panga chu Mizoram Youth Commission (MYC) sponsorship-a coaching kalte an ni.
Thudawn danin UPSC Civil Service Preliminary Examination paltlang zingah hian Aizawl Centre atanga exam mi 10 awmin Delhi atanga exam Mizoram mi pakhat a awm bawk a. Aizawl centre-a exam zinga tling mi 10 zinga mi panga chu MYC sponsor-a coaching kalte an ni.
Hemi chungchanga The Zozam Times zawhna chhangin MYC Chairman Dr Vanlaltanpuia chuan kumin Civil Service Preliminary Examination paltlang zingah MYC buaipui mi panga lai an awm chu lawmawm an tih thu a sawi a, a kum telin prelims paltlang an awm chhoh zel an beisei a, IAS leh service danga tling pawh an awm zel an beisei thu a sawi a, an hmalakna chu hlawhtling chho tanah an ngai tih a sawi a, tunah chuan Mizo thalai zingah competative exam boruak kaih harhin a awm tawh tih a sawi.
MYC chairman chuan tuna prelims paltlang zinga mi, MYC sponsor ni lote pawh mains an exam-na turah anmahniin an duh chuan buaipui chhunzawm an hreh lo tih a sawi a, “Kan buaipui an duh chuan kan sum neih dante kan thlir ang a, an exam leh turah hian puih kan inhuam khawp mai,” a ti.
MYC-in an buaipui, UPSC paltlang mi panga zinga pahnih chu kum 2020-a Delhi-a coaching kaltir, IAS Super 20 zinga mi kha an ni a, pakhat chu tuna coaching kal mek IAS Super 40 zinga mi a ni a, mi pakhat chu kum 2017-18-a MYC-in Aizawla coaching class a buatsaiha kal niin, mi pakhat dang leh chu KC Zalena niin, ani hi a exam-na tur atan sensote MYC-in a puih, tuna mains exam lehna tur pawh MYC-in a buaipui tur a ni.