Tennis superstar Novak Djokovic chuan a ropuina a nemnghet a, a tum ram thlengin mipa record ni turin a vawi 23-na atan Grand Slam inelnaah a champion.
Pathianni zanah French Open final-ah Serbian star hian hnehna a chang a. Casper Ruud lakah chak zawkin bul tan tha lo mahse a tawp a khar tha a, mipa tennis a thunun chhunzawm.
Kum 36 mi Djokovic hian Court Philippe Chatrier-ah hian nidang angin bul a tan tha lo. Set khatna la mai thei lovin tie break an khelh a ngai.
Tie-breaker an khelh atangin Djokovic a che dik tan a, kheltha tluang thei zuiin 7-6 (7-1) 6-3 7-5 a hnehna chang turin a tawp thleng a tang tluan.
A tum ram a thleng ta
Djokovic hian a elpui hlun Roger Federer leh Rafael Nadal ten Grand Slam title an lak zat chu khum ngei a duh thu a lo sawi tawh thin. Kumin Roland Garros-ah a tan hun a inhawng.
Tournament khelh hma in Grand Slam hnuhnung pali atanga vawi thum champion hi rinkai a ni. Mahse hliamin a tibuai ve tho.
Final a luhna turin semi-final ah rinkai seeded number one Carlos Alcaraz a hneh.
Final-ah kum 24 mi Ruud hneh turin a chakpui fo thin a rilru huaisenna leh tlo na, a chiai ve ngai lohna chu a chhawr hle.
Set khatnaah Ruud-a’n a nawr nasat avangin tihsual avanga point chawi a ngah. 4-2 in a hniam zawk hman.
Nimahsela set an khelh rei deuh hnuah a insiamtha thei a. Tie-break a thunun hneh viau hnuah set hnihna chu minute 48 chhungin a la.
Set thumnaah an inkhel tawk viau a, nimahsela tawnhriat nei tha zawk Djokovic-a’n hun pawimawh takah a khingpui a nawr na a, inkhel a dahtha thei.
A ropui teh e
Hnehna a chan avangin Djokovic hian Rafael Nadal lehpelin Grand Slam title 23 a la tihna a ni a. Hei chauh hi ni lovin mipa zingah Grand Slam title pali hi vawi thum tal la vek thei awmchhun a ni.
Grand Slam title lak tam zawngah hmeichhe tennis legend Serena Williams chu a tluk chiah a. Vawi 24 champion Margaret Court chiah a pha lo tawh.
Thla tharah Court-i record hi tluk theihna hun a nei dawn a, vawi sarih a champion tawhna Wimbledon-ah rinkai a ni leh ang.
SW13-ah hian a champion leh a nih chuan vawi riat champion thei Roger Federer a tluk dawn tihna a ni.
Djokovic-a record siamlai entu leh lawmpuitu an tha hnem a. American football star
Tom Brady bakah football star Kylian Mbappe leh Zlatan Ibrahimovic te pawh an tel.
“Ropui ber ka inti lo”
A champion hnuah Djokovic chuan, “Grand Slam 23 a ka champion thei hi vannei piahlam ka ni a, thil ropui tak ka tan chuan a ni. Kum sarih ka nihin Wimbledon a champion ve hi ka suangtuah thin a, world number one nih ka chak thin. Vawiinah hetiang dinhmun a ka awm hi malsawmna a ni.” tiin a sawi.
“Ka hmalam hun hi thui tak ka kutah a innghat niah ka ngai. Chuvangin thalai tu hnenah pawh, hmalam hun eng zawk i duh chuan i kutah khan a innghat tih hi ka sawi duh a ni.” a ti a.
“Ropui ber tunge ti a inhnialnaah hian ka tel dawn lo. Keichuan hmalam thlirin ka tih tur ka ti mai. Ropui ber ka inti lo. Heng hi chu midang sawiho turah ka dah.” a ti bawk.
Grand Slam singles title lak tawhte :
Australian Open : 2008, 2011, 2012, 2013, 2015, 2016, 2019, 2020, 2021,
2023
French Open : 2016, 2021, 2023
Wimbledon : 2011, 2014, 2015, 2018, 2019, 2021, 2022
US Open : 2011, 2015, 2018
Grand Slam tournament record thenkhatte :
- Triple Career Grand Slam
- Non-Calendar Year Grand Slam
- Season khat chhungin court hrang chi thumah Grand Slam title a la vek thei
- Grand Slam final vawi 34 khel thei awmchhun
- Grand Slam title a zawnin vawi thum tum li a la thei
- Grand Slam pali-ah vawi sarih aia tam final a khel vek
- Grand Slam pali-ah a zawnin kum thum final a khel vek
- Grand Slam pali-ah hnehna a chang hnem ber (81)
- Season khatah Grand Slam tournament-ah match 27 a chak zawn