Denver Nuggets in an tum ram an thleng. An franchise chanchin a vawikhatna atan NBA champion an ni a. Thawhlehni zingah Miami Heat lakah hnehna changin Larry O’Brien Trophy an chawi.
Denver a Ball Arena-ah NBA Finals game 5 hi khelh a ni a. 3-1 a series a hma hruai tawh Denver hian vawikhat chak bak an mamawh tawh lo.
Miami Heat in beiseina tinung turin chak ve ngei an tum, an tan tlawm a thiang tawh lo. A tir quarter thum chhungin hmahruaitu ni tam zawk mahse inkhel tawp dawn lamah Denver an insangmar a. 94-89 in hnehna an chang ta zawk.
Second 90 vel a la awmin Bruce Brown hmangin Denver in hma an hruai a. A tawp thlenga inpawhthlak tir leh tawh lovin defence nghet leh tlo takin an khel tluan.
A tawpah chuan
Kum 1967-ah Denver Nuggets hi din an ni a, American Basketball Association hunlai a ding tawh nimahsela tun thlengin hlawhtlinna sang ber an la tawng baw ngai lo.
Game 5-ah hian Heat in theihtawp chhuahin hnehna ‘fight’ chhuah an tum. An hlawhtling teuh.
Denver tan erawh hun pawimawhah Nikola Jokic a inlar a, point 28 leh rebound 16 a nei.
Nidang anga an “offense” kal loh tumin Michael Porter Jr. leh Jamal Murray ten point 16 leh 14 an thawh a pawimawh a. Bench atang Brown tangkai in Aaron Gordon-a defence khelh chu an chakna hnar a ni.
Kuminah erawh team nghet leh tha, theihna sang tak nei mai bakah tumruh leh tangrual tak an din a. Regular season atang tawhin NBA Playoffs thlir ranin an khel. Western Conference-ah seeded sang ber an ni a, league pumpui a record nei tha ber an nih theih laiin Playoffs an thlir avangin star player te an chawlh hahdam tir.
Playoffs an khel chiah a, team tha ber an ni tih chiang takin a lang. Finals lut turin Minnesota Timberwolves an hneh a, champion tura rin zinga tel Phoenix Suns hneh lehin Conference Finals-ah Los Angeles Lakers chu 4-0 in an sawp.
Denver team-ah an All-Star neih chhun Jokic a langsar a, NBA chanchin a Playoffs season khat a point 600, rebounds 269 leh assist 190 nei thei hmasa ber a ni a. NBA Finals MVP a ni.
Mahse Jamal Murray fak loh theih a ni lo bawk. All-NBA team a la lang ngai lo nimahsela star player dik tak a ni tih a lantir.
Jokic chuan, “Keimahni tan kan khel lova, kan team tan leh kan bul ami theuh tana khel kan nih avangin kan chak a, kan hnehna hi a hlu bik a ni.” tiin tanrual chu an chakna a nih thu a sawi.
Heat tan a uiawm
Miami in theihtawp chhuah mahse an tlin lo. Jimmy Butler an nei a, engkim a ti vek thei bik lo.
Point 21 score in Bam Adebayo chuan 20 a thawh bawk a, amaherawhchu Miami in an ‘offense’ ah kim lohna an nei a, Butler leh Bam te ringawtin an hnuk kal zo lo.
Shooter rintlak Tyler Herro awm loh an tuar. Hliam vangin game hmasa pali khel lovin game 5-ah damkawr la ni in an chhawr ngam lo. An mamawh huna point pawimawh score tur an neih loh an tuar.